Obra de Sofía González Sánchez, del CRA Castrillón-Illas
- Participaron 30 neños y neñes de 10 colexos
- La inauguración de la esposición con toles mascotines y la entrega premios sedrá’l día 24 d'abril na Casa la Cultura a les 18:00 hores.
Sofía González Sánchez, alumna de 5u cursu del CRA Castrillón-Illas resultó ganadora del XI Concursu de Mascotines dientro de les actividaes de les XII Xuntes d'Escolines y Escolinos d'Avilés y la redolada. Esti concursu convócalu la Conceyalía de Cultura del Conceyu d’Avilés, al traviés de la Estaya de la Llingua.
El tema foi "La pallabra más prestosa". Los maestros y maestres escoyeron la pallabra "Asturies" y sobre esi tema, escolinos y escolines ficieron les mascotines. Nel casu Sofía, la mascotina ganadora llámase “Cuatriadina” y representa una modalidá de los bolos asturianos, la cuatriada.
Participaron 30 dibuxos por parte d’otros tantos neños y neñes de 10 colexos d’Avilés y la redolada: CEIP La Carriona, CEIP Llaranes, CEIP Versalles, CEIP Palacio Valdés, CEIP Marcos del Torniello, CEIP Apolinar García Hevia, Colexu Santo Tomás, Colexu Principado, CEIP Manuel Álvarez Iglesias y CRA Castrillón-Illas.
La esposición con toles mascotines inaugúrase'l día 24 d'abril na entrada del Auditoriu de la Casa la Cultura. Esi día entréguense tamién los premios por parte del conceyal de Cultura, Román Álvarez. Ta prevista la presentación de l’actividá a cargu de la compañía Nun Tris.
El xuráu calificador del Concursu tuvo formáu por Ricardo Fernández López (artesanu alfareru), Miguel Solís Santos (académicu de la llingua asturiana y dibuxante) y Montse Machicado Compañy (responsable de la Estaya de la Llingua d’Avilés). Los tres trabayos premiaos son:
- “Cuatriadina”, de Sofía González Sánchez. CRA Castrillón-Illas. 200 euros
- “Folixín”, d’Enma Iglesias Fernández. CEIP La Carriona-Miranda. 100 euros
- “Asturies”, d’Andrea Coalla Moisés. CEIP La Carriona-Miranda. 100 euros
