Renzi reunióse col so homólogu maltés, Joseph Muscat, pa tratar la traxedia asocedida mientres el fin de selmana y repitió'l so llamáu a un conceyu estraordinariu de xefes d'Estáu y de Gobiernu de la UE pa debatir sobre inmigración.

   Según precisó, el númberu de llamaes pidiendo socorru d'embarcaciones con inmigrantes aumentó y esti añu trabayóse nel rescate de dos barcos más. Unu d'ellos ye una embarcación hinchable a unes 30 milles de Libia con ente 100 y 150 persones a bordu, mientres que l'otru ye un barcu mayor y llevaría a unes 300 persones.

   "Lo que ta asocediendo nestos momentos nel Mediterraneu ye muncho más qu'un naufraxu: tamos en presencia d'un grave momentu de crisis humanitaria qu'hai qu'enfrentar como tala y xestionar sobre la base del Derechu Internacional Humanitariu", defendió'l primer ministru italianu.

   "Siguir pensando en dexar partir pesqueros de la muerte, pa depués acudir a socorrelos, significa poner en peligru vides humanes", alvirtió, reclamando una respuesta sólida de la comunidá internacional nel so conxuntu".

   "La crisis en cursu requier la implicación non solo de Malta ya Italia", insistió Renzi, pal que los traficantes de persones son "los nuevos esclavistes", y por ello dexó claro qu'una de les estratexes a siguir ye acabar con estes redes de tráficu de persones.

   Pela so parte, Muscat indicó que, de confirmase les informaciones apurríes polos sobrevivientes, habría unes 900 persones a bordu del pesqueru que se fundió'l domingu n'agües próximes a Libia.

Foto: archivo AFP.