Madrid (Portaltic).-La cadena de televisión HBO criticó'l nuevu serviciu de 'streaming' de videu de Twitter, Periscope, por facilitar la retresmisión illegal del primer capítulu de la quinta temporada de 'Juego de Tronos', emitíu'l pasáu domingu.

   Dellos usuarios ficieron 'streaming' del estrenu de la quinta temporada al traviés de Periscope y los responsables de HBO encrispáronse. Un voceru de la cadena atacó al serviciu de Twitter diciendo que los desarrolladores tendríen que tener mecanismos eficaces pa qu'esti tipu de violaciones de derechos d'autor nun se produzan.

   Acordies col mediu The Hollywood Reporter, los creadores de Juego de Tronos tuvieron que notificar a Periscope les filtraciones y pidi-y que retiraren el conteníu. Al paecer, según l'aplicación de Twitter, dichu conteníu yá se retiró y tomáronse midíes contra les cuentes que filtraron l'estrenu de la serie.

   Periscope ye'l nuevu serviciu de Twitter que permite a los sos usuarios facer 'streaming' de videu en tiempu real -igual que la popular aplicación Meerkat- a la llista de contactos.

   Hasta agora los usuarios que nun taben soscritos a HBO optaben por descargar vía torrent o otru serviciu los capítulos de la famosa serie, pero con esti tipu d'aplicaciones de 'streaming' surdió una nueva alternativa pa los usuarios y un nuevu problema pa les cadenes y empreses.

   Habrá que ver qué pasa si siguen les retresmisiones illegales de conteníu al traviés d'esti tipu de servicios y qué midíes van tomar los sos responsables p'atayar el problema.