Sharky Jama, un mozu de 25 años de Melbourne, morrió en Siria combatiendo nes files d'Estáu Islámicu malpenes siete meses dempués de que decidiera abandonar la so vida como modelu na ciudá australiana pa empuñar les armes col grupu terrorista.

   El so padre, Dada Jama, confirmó qu'esti llunes recibió una llamada telefónica na qu'una persona sin identificar confirmó-y que'l so fíu morrió en Siria víctima de los disparos recibíos cuando combatía colos milicianos de negru.

   L'axencia de modelos australiana pa la que trabayó definiólu como un profesional "cariñosu" y "xenorosu", y aseguró que pudiera llegar bien lloñe nel sector

   Sharky Jama yera un mozu famosu en Melbourne, según relata'l diariu The Australian. El so trabayu como modelu colocáralu como una celebridá y apaecía con cierta frecuencia sorriente en fotografíes acompañando a guapes muyeres n'esclusivos clubes nocherniegos.

   Sicasí, fai daqué más de siete meses, empezó a radicalizase y treslladóse a Iraq entrando dende territoriu européu pa incorporase a les files d'Estáu Islámicu, el grupu que lidera Abú Bakr al Baghdadi y que semó la medrana n'amplies zones d'Iraq y Siria.

   Jama ye ún de los 20 australianos que se cree que morrieron combatiendo en Siria ya Iraq dendel 2012, de los que trés son ciudadanos del estáu de Victoria --al que pertenez Melbourne-- que perdieron la vida nes últimes cinco selmanes.

   Otres dos persones próximes al fináu aseguraron n'Internet que Jama tornó en 'shahid' (mártir) y delles más esplicaron que lo caltuvieren de callao porque esperaben a que la familia tuviera informada y recibiera les condolencies.