El Ministeriu del Interior publicó esti xueves un comunicáu pa salir al pasu "d'informaciones infundaes" en redes sociales y otres canales de comunicación nel que sorraya que nun modificó'l nivel d'alerta antiterrorista dende'l pasáu xineru.

   En concreto, Interior recuerda que'l pasáu 7 de xineru, con ocasión de los atentaos de París, elevó'l nivel d'alerta a "nivel 3 con intensidá baxa" y dende entós nun lu modificó.

   Amás, informa que cualquier cambiu nel nivel d'alerta antiterrorista tresmítese a los medios de comunicación y faise pública al traviés de les canales avezaes de comunicación del Ministeriu del Interior y de les Fuerces y Cuerpos de Seguridá del Estáu.

   "Otres canales de comunicación que nun seyan los oficiales nun tienen credibilidá en materia d'alerta antiterrorista y, munches veces, namás pretenden provocar estaos de medrana na población o otros fines ayenos dafechu a la seguridá", avisa'l Departamentu que dirixe Jorge Fernández Díaz.