El pesqueru con bandera rusa 'Oleg Naydenov' fundióse anueche a les 22.45 hores a 15 milles al sur de Punta Maspalomas a una fondura de 2.400 metros, según informó Salvamentu Marítimu.
El remolcador Punta Salinas permanez na zona del fundimientu y de momentu nun aprecia contaminación na zona. Salvamentu Marítimu movilizó medios de llucha contra la contaminación pa verificar si hai vertíu y actuar si ye necesario.
A les 07.30 hores movilizóse l'avión de Salvamentu Marítimu Sasemar 305. Coles mesmes, el buque de llucha contra la contaminación 'Miguel de Cervantes' ta activáu.
Esti buque tien 56 metros d'eslora, 10.300 C.V. de potencia y gran maniobrabilidá. La so capacidá de recoyida ye de 290 m3 y dispón de brazos de recoyida de contaminación con bombes d'aspiración, barreres de contención, skimmers y tanques d'almacenamientu a bordu.
