El coordinador de la xestora territorial d'UPyD-Asturies, Alfredo del Río Abreu, confirmó esti martes que la formación va presentar llistes a los trés circunscripciones asturianes nes elecciones autonómiques y tamién n'Uviéu, Xixón, Grau, Ribesella y Piloña nel marcu de los comicios municipales.

   Asina se decidió mientres l'Asamblea Territorial d'afiliaos y simpatizantes que'l partíu celebró esta tarde n'Uviéu, la primera dende que cesaren al anterior Conseyu Territorial y nomárase l'actual xestora del partíu n'Asturies.

   Del Río señaló que, magar nun poder celebrar un procesu de primaries polo axustao de los plazos, los afiliaos d'UPyD Asturies "van escoyer al candidatu de la circunscripción central, d'ente aquéllos que se postulen, nuna Asamblea que va celebrase'l próximu sábadu día 18 d'abril".

   D'otra manera, van ser los afiliaos d'UPyD-Xixón los que, per mediu d'una Asamblea Llocal que va celebrase'l próximu vienres, escueyan al so candidatu al conceyu de la ciudá.

   "Los compañeros tán demostrando más ganes y coraxe que nunca. Nun podemos negar que tamos travesando un momentu complicáu, pero UPyD nunca tuvo un camín fácil y los afiliaos y simpatizantes tán demostrándonos que merez la pena tol esfuerzu que seya posible. Toi seguru qu'UPyD va dar la talla tamién nesta situación", acabó'l coordinador de la xestora.