El fiscal xefe provincial de Lleón y representante de l'acusación pública nel casu del crime d'Isabel Carrasco solicitó una pena de 23 años de prisión pa caúna de les trés imputaes pola muerte violenta de la política lleonesa, Montserrat González, la so fía Triana Martínez y la policía llocal Raquel Gago.

   La hipótesis qu'embaraxa'l fiscal xefe, Emilio Fernández, ye que les armes que s'alcontraron nel rexistru domiciliariu practicáu na casa na que vivíen davezu Montserrat González y Triana Martínez taben tamién a disposición de Raquel Gago, según una información d'El Diario de León, recoyida por Europa Press.

   D'acuerdu a esta hipótesis, les trés sospechoses teníen al so algame'l revólver col que se cometió'l crime y, tamién, otra pistola qu'apaeció nel rexistru practicáu polos axentes.