La defensa del exsociu d'Iñaki Urdangarin, Diego Torres, propunxo que declaren nel xuiciu que prevé celebrase pol casu Nóos hasta un total de 696 testigos, ente los que s'alcuentren el rei Felipe VI, Juan Carlos de Borbón, Sofía, la infanta Elena, el so antiguu home Jaime de Marichalar, Pilar de Borbón y la princesa Irene de Grecia y Dinamarca.

   Per mediu del escritu de defensa que Torres, xunto con más de 450 páxines con correos electrónicos, presentó ante'l xuez José Castro pa retrucar les acusaciones que contra él caltién la Fiscalía Anticorrupción, que reclama 16 años y mediu de cárcel pal procesáu, el so abogáu solicita les anteriores comparecencies coles mires d'acreditar cómo la Casa Real taba al corriente de les actividaes esplegaes pol Institutu Nóos.

   Ello ye que nel so escritu, al que tuvo accesu Europa Press, el lletráu Manuel González Peeters recalca qu'al traviés de la entidá na qu'Urdangarin y Torres yeren socios "nunca se fizo nada sin antes informar" al secretariu de les infantes, Carlos García-Revenga, "y a la Institución qu'él representaba y que lu autorizaba too, pues en casu contrariu nada se facía".

   D'esta manera defende l'abogáu que siempre s'operó "con absoluta tresparencia", ya incide en que "ye imposible caltener" que, con eses premises y "col exércitu d'asesores" colos que cuenta la Casa Real, "qu'interveníen de manera activa y determinante", pudieren Torres y la so muyer, Ana María Tejeiro, "tener la más mínima sospecha de que daqué anómalo pudiera tar llevándose a cabu".

   Coles mesmes, la defensa de Torres propón la declaración de la noble alemana Corinna zu Sayn-Wittgenstein, que realizaría xestiones pa emplegar a Urdangarin nuna fundación internacional; el ministru d'Educación, Cultura y Deporte, José Ignacio Wert; los antiguos ministros Rodrigo Rato y Alberto Ruiz-Gallardón; l'antiguu presidente de la Generalitat Valenciana Francisco Camps; l'alcaldesa de Valencia, Rita Barberá, y el vicesecretariu d'Estudios y Programes del PP, Esteban González Pons.

   Nel so escritu, la representación procesal de Torres sorraya que la idea del Institutu Nóos surdió de les conversaciones que caltuvieron nel so día Urdangarin, la Infanta Cristina, García Revenga y el daquella xefe de la Casa Real, Alberto Aza, con dellos profesores de la escuela d'estudios superiores Esade, ente los que s'alcontraba él mesmu. L'oxetivu: "promover proyectos, estudios y congresos sobre patrociniu, mecenalgu y responsabilidá social".

   La defensa apela a la bondá de cuanto se punxo en marcha al traviés de Nóos y asegura que "nenguna, absolutamente nenguna illegalidá tuvo llugar, dende nengún puntu de vista posible, nin directu nin indirectu", negando "dafechu cuanto argumenten la totalidá d'acusaciones".

TOLOS EVENTOS RESPONDIERON "A UNA NECESIDÁ REAL"

   Ello ye que sobre los conceyos sobre turismu y deporte que tuvieron llugar en Palma y Valencia, ente otros eventos polos que l'Institutu percibió hasta 6,2 millones d'euros públicos, desconociéndose parte del so destín, asegura que "respuenden toos ellos a una necesidá real, tando amplia y enforma xustificada la oportunidá y bondá de la so realización".

   Ye más, al respective de les negociaciones previes que llevaron a cabu dambos antiguos socios coles autoridaes valencianes y baleares de cara a l'axudicación de los cónclaves, y que según les acusaciones favoreceríen la posterior contratación 'a deu' del Institutu Nóos, xustifica qu'esti tipu d'actividaes "nun se fai d'un día pa otru, sinón que precisa d'abondos meses de trabayu primero que se celebre l'acontecimientu".

   "Nun ye cierto qu'a Nóos lu contrataren por cosa distinta a la realidá de los sos proyectos propios, que respondíen a una realidá previa porque yeren intrínsecamente d'interés y amás teníen, como n'efecto tuvieron, un estraordinariu impactu de tou puntu positivu", calca al respective l'abogáu de Torres, que niega coles mesmes que los precios fixaos pola entidá liderada por dambos socios pa que les Alministraciones patrocinaren los sos proyectos tuvieren "fuera de mercáu", como postula la Fiscalía.

   González Peeters esclara nesti sentíu que les Instituciones públiques "nun contrataron la prestación d'un serviciu", sinón que de lo que se trataba yera de "patrocinar el novedosu proyectu del Institutu Nóos y asina lo decidieron, porque sin llugar a duda de suerte alguna yéra-yos y foi bien beneficioso dende cualquier prisma posible".

   Sobre la xestación de la Valencia Summit, que celebró les sos nos años 2004, 2005 y 2006, l'acusáu recuerda que foi nel 2003 cuando Urdangarin, "en falando cola so esposa d'esi tema y d'otros de corte profesional", escribió a García Revenga informándo-y, "como siempre foi'l casu, pues nunca se fizo nada" sin antes comentá-ylo, "de les acciones previstes".

ALCUENTROS DE LOS DUQUES DE PALMA COLES AUTORIDAES

   "Existieron alcuentros ente Urdangarin, la so muyer y l'alcaldesa de Valencia, unu d'ellos na Zarzuela y otru posterior, de corte informal, de toos ellos con García Revenga", calca'l lletráu de Torres pa recalcar en cómo la Casa Real taba al tantu de tolo qu'asocedía nel senu del Institutu.

   Ye más, precisa que los contactos con Valencia produxéronse nes Navidaes del 2003 al 2004, "más pola casualidá que por otra razón", y señala qu'existió una xunta na Zarzuela, el 29 de xineru del 2004, con Barberá y Camps, pa darréu producise "la converxencia d'intereses qu'a lo último dio llugar a la Valencia Summit del 2004". "Yera y foi l'Institutu Nóos el que lo entamó, pos yera'l so proyectu", remarca.

   Per otru llau, la defensa reprocha'l fechu de que la instrucción de la causa llevárase a cabu al traviés de pruebes llograes "resalvando dafechu los derechos fundamentales a la tutela xudicial efectiva y a un procesu coles debíes garantíes", lo qu'a los sos representaos "causó-yos manifiesta, determinante y proscrita indefensión". Por ello, sorraya que se ta na necesidá de decretar "la nulidá de plenu derechu" del casu, cola absolución de los sos patrocinaos.