El dibuxante Francisco Ibáñez celebró los 200 númberos de los álbumes de Mortadelo y Filemón con una nueva historia titulada 'El tesorero' (Ediciones *B), que va salir a la venta mañana miércoles, protagonizada por un personaxe que recuerda al extesoreru del Partíu Popular Luis Bárcenas magar l'autor negó interés en "facer crítica social".

   "El tesoreru ye un personaxe que surde de pura casualidá, quiciabes de manera inconsciente al ver tolo que salía en televisión y radio. Pero nun m'aprovecho d'él pa criticar la so forma de facer, de pensar o de maniobrar, sinón pa qu'haya 1.000 gags", esplicó Ibáñez na presentación.

   La trama de 'El tesorero' presenta numberoses semeyances cola actualidá, partiendo d'un ministru 'del peculiu' (tamién con cierta paecencia a Cristóbal Montoro) que fai un encargu a la T.I.A., en comprobando que saquiaron la tesorería del 'Partíu Papilar'.

   La misión de los dos axentes va ser la de vixilar al tesoreru d'esta formación, con un sele enclín a llevantar el deu corazón en determinaes situaciones. "Pensé en cómo estremar a esti personaxe de los de siempre, y acordéme d'una serie en televisión de marcianos que baxaben a la Tierra y teníen esos deos gordos", xustificó'l dibuxante.

   En tou casu, repitió que'l so interés nun taba enfocáu na crítica a políticos. "Nun quería que la xente lleera'l cómic y dixera sobre los personaxes: 'mira esi tíu, qué mal lo fai'. Pa eso yá ta'l críticu social y políticu, yo namás quiero que la xente que lo ta pasando mal garre'l mio llibru y disfrute", indicó.

   Nesti sen, Ibáñez entiende que 'El tesorero' recuerda a "aquelles peliculines antigües llamaes 'de celuloide ranciu'" na que nun existe un interés pola película en global sinón pola socesión de gags que percuerren la obra.

   Los peligros de llevar al cómic personaxes con cierta paecencia a persones con cierta relevancia nun-y xeneraron problemes a esti dibuxante, que reconoció que l'auténticu riesgu existía mientres el franquismu cola censura, época na que "tenía qu'andar con cuidáu".

"NUN FAIGO CRÍTIQUES SANGRIENTES"

   "Pasada esa etapa pudiéronse facer toles coses, partiendo de la base de que yo nun faigo crítiques sangrientes. El que se vea retratáu nun personaxe nun ye pa poneme un pleitu", destacó, en recordando algún de los sos incidentes cola oficina de censura.

   Quiciabes esa falta de 'sangre' na semeya seya'l motivu pol qu'Ibáñez "nunca" tuvo quexes en contra de les sos creaciones. "Como muncho, silenciu absolutu", matizó, n'apuntando por exemplu que l'expresidente del Gobiernu Felipe González --representáu pol dibuxante en más d'una ocasión-- yera un gran fan de les sos historietes.

   En concreto, Ibáñez señaló un episodiu con 'El 13 rue del percebe', aquel edificiu peculiar ocupáu por inquilinos de diversa índole. "Había un personaxe que yera'l Dr. Frankenstein, que cada tira inventaba una nueva bisarma, hasta qu'un día tacháronlu de censura argumentando que 'qué yera eso de crear persones vives cuando solo podía facelu el Sumu Creador'", comentó ente rises.

   Nesta mesma llinia, entiende que quiciabes seyan los mesmos llectores los qu'apurran "un tresfondu político" a los sos personaxes, viendo más allá de les sos intenciones humorístiques iniciales. "Dalgún vínome diciendo lo acertao que taba cola miopía de Rompetechos, o la semeya que facía de los políticos con Pepe Gotera y Otilio, que tolo estropiaben", recalcó.

SIN XUBILACIÓN

   Comoquier, dio la so opinión al respective de l'actuación de los políticos españoles. "Dacuando digo que MOS faen la competencia deslleal a los dibuxantes, porque la xente rise más colo que dicen ellos que colo que faCemos nós. Pero qué-y vamos faer, ye la competencia", esplicó con humor.

   'El tesorerO' va salir a la venta esti miércoles 8 d'abril yá na so segunda edición --por cuenta de la demanda de les llibreríes-- con una tirada acumulada de 50.000 exemplares. Dende la primer tira publicada nel añu 1958 na revista 'Pulgarcito', Mortadelo y Filemón cuenten con 1.200 páxines editaes y más de 29 millones d'exemplares vendíos.

   A los sos casi 80 años d'edá, Ibáñez confesó con una sorrisa que quería xubilase yá pero "los 'gerifaltes' de la editorial impíden-ylo". "Nun me faen nin casu, gárrenme y dícenme: 'mira, ésti ye'l 'planning' pal próximu añu", bromió.

SUELDINOS BAXOS

   A día de güei, l'autor yá trabaya nel so nuevu trabayu colos dos axentes de la T.I.A., 'Sueldecitos más bien bajitos', na que va volver a l'actualidá pa falar de la rebaxa de sueldos que va afectar a Mortadelo y Filemón, obligaos a buscase un segundu empléu pa sobrevivir. "Lo bono de trabayar cola actualidá ye que cada nuevu tema dámelo la prensa y enriba nun pago derechos d'autor. Ye maraviyoso", destacó.

   A estos éxitos en papel súmense les adaptaciones recientes na gran pantalla de la mano de Javier Fesser, coles qu'Ibáñez mostróse "d'acuerdu dafechu". "Tienen dinamismu, vivacidá... al contrario que los dibuxos animaos que se ficieren antes colos mios personaxes: más bien paecíen desanimaos", acabó.