El cómicu Pedro Reyes morrió esta nueche en Valencia, según confirmó a Europa Press el so representante. El cuerpu sin vida del humorista apaeció na so cama y va practicáse-y l'autopsia pa determinar les causes del fallecimientu, anque s'abarrunta que pudo ser por un infartu.
Reyes, de 53 años, tenía nestos momentos proyectos en marcha en televisión como una collaboración col programa de Cuatro 'Sopa de Gansos', y taba representando la obra teatral 'Taxi', con Josema Yuste en Málaga.
El tamién humorista Pablo Carbonell dio a conocer rápido la muerte del so "amigu y compañeru" al traviés de Twitter. "Yera un gran cómicu y bona persona. Descanse en paz", escribió Carbonell na rede social.
L'actor y humorista, que nació en Tánger y crióse n'Huelva, yera conocíu especialmente pol so trabayu en televisión. Algamó gran fama gracies a la so participación nel programa d'humor de sobremesa 'No te rías que es peor', espaciu d'humor en La 1 de TVE presentáu pol yá tamién desapaecíu Jordi Estadella. Nesa mesma casa tamién apaeció n'espacios míticos como 'La Bola de Cristal', '¿Pero esto qué es?' y tambíen en '¡Hola Raffallea!'.
Tamién lu vimos en series como 'Manos a la obra', 'Makinavaja', 'Abierto 24 hores' o 'Los homes de Paco'. Los sos últimos trabayos na pequeña pantalla fueron como concursante na tercer edición de 'Mira quién baila', en 'El Club de la Comedia', onde apaeció en delles ocasiones y como collaborador ocasional del programa nocherniegu 'Buenafuente'.
Nel cine Pedro Reyes apaeció en delles películes. El so prmer trabayu foi en 1985 na comedia 'Sé infiel y no mires con quién'. Na gran pantalla tamién lu vimos en títulos como 'Los invitados', El año de las luces', 'Divinas palabras', les dos entregues de 'Makinavaja' o 'Atún y Chocolate', a les ordes del so amigu Pablo Carbonel. El so últimu trabayu cinematofráficu data del añu 2007 na comedia d'animación p'adultos 'La crisis carnívora'.
