Andecha Astur, al traviés del Diputáu Jon Iñarritu -Amaiur-, miembru de la coallición Los Pueblos Deciden de la que forma parte, presentó al Gobiernu español una entruga pidiendo desplicaciones pol plan p’aumentar los antidisturbios n’Asturies.

Dempués de la "xabaz destruición del texíu económicu asturianu, y de la sangría d’asturianos obligaos a emigrar y l’esaniciu de seutores estratéxicos de la economía asturiana comu la minería, la metalurxa o’l naval, l’anuncia pol Ministeriu d’Interior español del aumentu d’antidisturbios n’Asturies, supón una menacia de nueves “reconversiones” énte les que l’Estáu español refuercia’l so aparatu represivu".

Asturies ye una de les naciones del estáu con menores niveles de criminalidá, pero con mayor conflictividá social "en rempuesta a l’aplicación de les polítiques neolliberales españoles empobinaes al esfarrapamientu del texíu económicu asturianu que ta prevocando niveles de paru, precariedá llaboral, probitú y emigración forciada comu hai tiempu que nun se conocíen nel nuesu país".

Nesi sen, el plan presentáu pol Ministeriu d’Interior español "que plantega reforciar con un grupu más los efeutivos de la novena unidá, con sede n’Uviéu, que pasará de dos a trés, y amiestará 95 miembros más a estes fuercies represives, costitúi una auténtica menacia, que fai camentar en nuevos procesos d’esfarrapamientu industrial y d’agresiones a los trabayaores asturianos".