La Fiscalía de l'Audiencia Nacional solicitó penes de dos años y trés meses de cárcel pal presidente del Fútbol Club Barcelona, Josep Maria Bartomeu; y de siete años y mediu pal so antecesor Sandro Rosell por un fraude fiscal de más de 13 millones d'euros que presuntamente cometeríen nel fichaxe del delanteru brasileñu Neymar.
Amás, reclama pa los dos mandatarios y pal club como persona xurídica multes ya indemnizaciones por responsabilidá civil que superen los 62,6 millones d'euros.
Nun escritu enviáu esti llunes al xuez de l'Audiencia Nacional Pablo Ruz, el fiscal José Perals atribúi a Bartomeu un delitu fiscal supuestamente cometíu nel 2014 y pide pa él una multa de 3,8 millones d'euros, mientres qu'acusa a Rosell de dos delitos fiscales cometíos nos años 2011 y 2013 --polos que pide dos multes qu'asciendan a 25,1 millones-- asina como un delitu societariu.
Al Barça como persona xurídica impúta-y los trés delitos contra la Facienda Pública atribuyíos a los sos dirixentes y reclama que pague multes por valor de 22,2 millones d'euros, a razón de 4,8 polo que dexó de tributar nel 2011; 13,5 polos impagos correspondientes al 2013; y 3,8 polos relativos al exerciciu fiscal del 2014.
En conceptu de la responsabilidá civil que podría aplicáse-yos al dictar la sentencia, el Ministeriu Públicu reclama que'l Barça y Rosell paguen una indemnización de 9,5 millones d'euros y que'l club y Bartomeu abonen pol mesmu conceptu otros 1,9 millones.
RECARGU POR PAGAR FUERA DE PLAZU
El fiscal señala qu'a estes cantidaes tendrán que sumase los recargos por "ingresu extemporaneu" que correspuendan anque estes cuantíes van compensase colos 13,5 millones d'euros que'l Fútbol Club Barcelona abonó'l pasáu 24 de febreru al presentar una declaración complementaria.
Amás, solicita a l'Axencia Tributaria, dependiente del Ministeriu de Facienda, qu'emita un informe pa determinar si tienen que reclamase los recargos por pagu fuera de plazu que correspuenden a les cuotes impagaes nos años 2011, 2013 y 2014 y, nesi casu, que se cuantifiquen. Amás, pide que los auditores de Deloitte que revisaron les cuentes del club nesti periodu comparezan nel xuiciu como testigos.
El xuez Ruz, que tornó'l pasáu 13 de marzu les actuaciones en procedimientu embrivíu, trámite equivalente al procesamientu, cifró'l gastu total que'l club realizó pal fichaxe de Neymar en 83,3 millones d'euros, en contra de lo defendío por Rosell, que cifró la operación en 57,1 millones.
La Fiscalía de l'Audiencia Nacional elevó'l costu del trespasu a 94,8 millones d'euros al incorporar los 13,5 millones d'euros que'l Barça abonó en febreru del 2014 a l'Axencia Tributaria al presentase una declaración complementaria.
