Axentes de la Policía Nacional detuvieron na isla de Fuerteventura a Shane Wallford, de 38 años d'edá y el primeru de los 10 fugaos más buscaos del Reinu Uníu, gracies a la 'Operación Captura'.

   D'esta manera, l'arrestáu tenía en vixencia una Orde Europea de Detención y Entrega dende qu'en febreru del 2013 frayara les condiciones de la so llibertá condicional, según informa la Dirección Xeneral de la Policía.

   Al fugáu llocalizáronlu y arrestáronlu en malpenes cuatro díes dempués de que se publicara la so imaxe xunto a la d'otros nueve reclamaos poles autoridaes britániques.

   Asina, el pasáu sábadu, a les 11.30 hores, al fugáu interceptáronlu cuando pretendía embarcar nun vuelu con destino Irlanda, col enfotu de safar l'acción de la xusticia.

   Nesti sen, l'agora deteníu taba reclamáu per Reinu Uníu por fechos que del 2009 na población británica de Coventry.

SOLDÁU DEL EXÉRCITU BRITÁNICU Y BOXEADOR

   Wallford, soldáu activu del exércitu británicu, amás de boxeador profesional, personóse nun chigre y solmenó-y --creyendo que se trataba d'otra persona cola que tuviera un alcontrón antes-- una puñada a un bomberu llocal que taba nel interior del establecimientu celebrando'l so cumpleaños.

   L'agredíu cayó hacia atrás y golpióse la cabeza contra'l suelu, perdiendo de primeres consciencia, y finando a la mañana siguiente.

   Por estos fechos condenáronlu a cuatro años y mediu de prisión que cumplió parcialmente, hasta que nel 2013 frayó les condiciones de la so llibertá condicional y escapó.

   A lo último, la detención realizáronla axentes del Puestu Fronterizu del Aeropuertu de Fuerteventura cola collaboración de la Brigada Llocal de Policía Xudicial de la Comisaría del Puerto del Rosario.