L'Audiencia Nacional condenó a dos mozos a pagar dos multes de 380 euros por desear la muerte de la Familia Real y reflexar estes amenaces unu na rede social de Twitter y otra nuna manifestación republicana dempués de que'l rei Juan Carlos I anunciara la so abdicación el pasáu xunu.
El Xulgáu Central de lo Penal atribuyó a dambos un delitu d'amenaces ya inxuries a la Corona, en virtú d'un acuerdu de conformidá adoptáu esti martes ente les defenses de los acusaos y la fiscal Rosana Lledó, que rebaxó'l so pidimientu inicial que raspiaba los 6.500 euros pa caún.
Na vista, Silvia M. reconoció mostrar una pancarta, de 170x50 centímetros, iguada nuna sábana blanca, onde podía lleese "Muerte a los Borbones" mientres una concentración a favor de la República celebrada la tarde del pasáu 2 de xunu na plaza del Conceyu de Boiro (A Coruña), tres l'apaición en televisión de Juan Carlos esplicando los motivos de la so renuncia.
LA SO CUENTA TENÍA 172 SIGUIDORES
Darréu, l'otru acusáu, José J., aceptó tamién el pagu de la multa por utilizar la so cuenta personal el 21 de mayu y los díes posteriores a que don Juan Carlos ficieera pública la so renuncia, concretamente'l 6, 7 y 9 de xunu, pa publicar mensaxes que reflexaben, según la Fiscalía, un "evidente menospreciu menos a la persona del rei, a la institución y a les persones qu'encarna la Corona".
"Si tuviera delantre al príncipe matábalu, anque fuera con un alambre. Dalgún día voi asesinar a la Casa real", escribió l'acusáu, pa centrar n'otru mensaxe les sos ires sobre l'autor de los tuits de la cuenta oficial de la Casa Real española, sobre'l qu'escribió que "morrería ente terribles sufrimientos". Dende la so abertura en mayu del 2014, los siguidores de la cuenta de la Casa Real ronden los 204.000.
La cuenta del acusáu contaba con un total de 172 siguidores en Twitter a fecha del 21 de mayu del 2014 y los sos mensaxes alcontrábense accesibles pa cualquier persona, según l'escritu de conclusiones provisionales de la Fiscalía.
