El 11 de marzu del 2011 la tierra tremeció en Xapón, un país avezáu a los terremotos. Sicasí, el temblón de 9 de magnitú na escala Richter y con epicentru en Tohoku, na prefectura de Miyagi, nun foi unu más. Amás de provocar un gran tsunami con foles d'hasta 40 metros, desencadenó la peor catástrofe nuclear hasta la fecha nel país na central de Fukushima.

   Cuatro años dempués d'aquella traxedia, tovía queda munchu trabayu por facer, empezando pola identificación de les víctimes. Según l'últimu balance oficial, publicáu'l vienres pasáu pola Axencia Nacional de Policía, la triple traxedia dexó 15.890 muertos en doce prefectures, asina como 2.589 desapaecíos.

   El gruesu de les víctimes, 15.737, rexistróse nes prefecturas de Iwate, Miyagi y Fukushima. El 56 por cientu de los finaos fueron persones mayores de 65 años y el 90 por cientu de les víctimes morrieron por afogamientu. Anque nel últimu añu llogró identificase a otres 15 persones más, tovía hai 83 víctimes que nun tán identificaes.

   El terremotu, el tsunami y la catástrofe nuclear tamién provocaron la evacuación de decenes de miles de persones. Según un reciente sondéu realizáu pol diariu 'Asahi Shimbum', el 61 por cientu de los que quedaron sin llar en marzu del 2011 tovía siguen viviendo n'agospios temporales.

   L'estudiu, realizáu ente residentes de los trés prefecturas más afectaes, punxo de manifiestu que'l 59 por cientu de los desplazos n'Iwate siguen n'agospios temporales, mientres qu'en Miyagi ye'l 58 por cientu y nel casu de Fukushima la cifra elevóse hasta'l 66 por cientu. Un añu dempués de la triple traxedia, tolos desplazaos siguíen residiendo n'agospios temporales. La cifra pasó al 87 por cientu nel 2013 y al 76 por cientu nel 2014, según el diariu.

   Per otra parte, el 80 por cientu de los consultaos consideraron qu'existe disparidá na manera nel que les autoridaes tán llevando a cabu la reconstrucción y nel apoyu que se ta ofreciendo a les víctimes del desastre. En concreto, el 41 por cientu reclamen más subsidios pa gastos médicos, el 32 por cientu apoyu financiero pa reconstruyir les sos cases y el 30 por cientu más subsidios pa poder cubrir los gastos.