Madrid (E.P.).-El ministru del Interior, Jorge Fernández Díaz, declaró esti martes nel Senáu que desconocía la existencia de la grabación que presuntamente realizó'l comisariu Villarejo de la xunta que caltuvo col presidente de la Comunidá de Madrid, Ignacio González. Según esplicó, desconozla porque nun figuraba nel espediente ellaboráu pola mesma Policía sobre la presunta investigación illegal que sufrió'l dirixente madrilanu sobre la propiedá del so áticu en Marbella y que se remitió al xuez.

   "Nel espediente nun s'informó d'esa grabación, yo enteréme igual qu'usté. Pue creyelo o non, pero esa ye la realidá y espero que'l xuez que ta actuando dende va dos años nel casu actúe si lo considera conveniente", dixo'l ministru na sesión de control al Gobiernu del Senáu al senador socialista Enrique Cascallana.

   Refierse'l ministru al espediente qu'ellaboró'l so propiu Departamentu al tener nicios de qu'a Ignacio González investigárenlu illegalmente, en referencia a la propiedá del so áticu de Marbella. Los resultaos d'esi informe derivaron nel cese del comisariu de Marbella, Agapito Hermes de Dios --como recordó'l ministru-- pero non de Villarejo, ante'l que'l comisariu destituyíu informaba de les sos investigaciones.

   Darréu, esi espediente remitióse va dos años al Xulgáu d'Instrucción Númberu 47 de Madrid qu'investiga la denuncia presentada por González contra'l comisariu Hermes de Dios.