Dirixentes del PP consultaos por Europa Press coincidieron esti llunes n'espresar la so medrana a que l'enfrentamientu ente la dirección nacional del PP y Esperanza Aguirre en referencia a la presidencia del partíu en Madrid se repita en cortu plazu pola ellaboración de les llistes electorales.

   Anque oficialmente lo mesmo Mariano Rajoy que la mesma Aguirre dieron por acabáu'l discutiniu, les fontes consultaes prevén una campaña complicada, teniendo en cuenta qu'esos desalcuentros ente 'Génova' y el PP de Madrid remontóse al 2008. Ello ye que fontes cercanes al presidente del Gobiernu hasta ven otra vuelta "un puxu" pa "debilitar" a Rajoy.

   La siguiente parada ye la ellaboración de les candidatures completes pa les autonómiques y municipales de mayu. El so plazu acaba a mediaos d'abril. Cargos del PP prevén otra vuelta tensiones porque toos van querer colocar a persones cercanes neses llistes, nun momentu en que se prevé un Parlamentu bien estazáu, nel que'l PP  va perder poder territorial y va tener menos representación.

   Asina, consideren qu'Aguirre va lluchar pa que sigan munchos de los sos collaboradores, mientres que Cristina Cifuentes, candidata a la Comunidá de Madrid, tamién va querer arrodiase d'un círculu de confianza. Paralelamente, 'Génova' va intentar tener ciertu control sobre la llista igual nel Conceyu que na Comunidá.

   "Toos van querer meter mano na llista", resume gráficamente un diputáu madrilanu. Ello ye que fontes del PP de Madrid aseguraron a Europa Press qu'Aguirre quier facer les llistes sin "intromisiones". Polo pronto, esti llunes el Comité Electoral rexonal dio'l preste a una decena de candidatos a alcaldes apostando pola continuidá. Asina, los rexidores d'Alcalá, Colmenar, Alcobendas, Coslada, Torrejón y Trés Cantos, ente otros, van repitir nos comicios de mayu.