Barcelona (E.P.).-El fíu del expresidente de la Generalitat Oleguer Pujol Ferrusola defendió esti llunes el so trabayu como xestor inmobiliariu y negó tener "3.000 millones d'euros", n'alusión esplícita a delles informaciones qu'apuntaron que disponía d'esti dineru.

   Na so comparecencia na comisión d'investigación del fraude y la corrupción que se celebra nel Parlament, manexó una auditoría de Deloitte a la so empresa pa demostrar que la so aportación de capital foi de poco más d'un millón d'euros: "Nun tengo trés mil millones. Muncho de lo que se dixo ye falso".

   Nuna declaración inicial de 45 minutos, aseguró que nunca xestionó dineru de la so familia, que nunca fizo operaciones relevantes en Cataluña y que nunca trabayó pa l'alministración pública: "nunca pidí la intervención del mio padre o'l mio hermanu en temes de recalificaciones o cambios d'usos".

   Remembró los sos entamos na banca d'inversión trabayando pa Morgan Stanley, y esplicó que volvió a España pa fundar Drago Capital porque detectó, xunto col so sociu, que nun había la figura del "xestor inmobiliariu" que trabayara con fondos institucionales y bancos d'inversión.

   Remitiéndose otra vuelta a l'auditoría de Deloitte, dixo que Drago Capital xestionaba, nel añu 2013, 2.730 millones d'euros con un total de 1.600 inmuebles, y argumentó que detrás hai una complexa estructura d'accionistes llegal y fiscalizada por esta auditoría.

   Entró nel detalle, sobremanera, de dos operaciones nes que participó, l'alquisición de 1.152 oficines del Banco Santander y l'alquisición de tres edificios del Grupu Prisa, dos operaciones que s'encuadren perfectamente, al so xuiciu, na actividá de la so empresa.

   Nel casu de les oficines del Banco Santander --una operación bien complexa, señaló--, destacó que'l Bancu d'España "miróla con lupa" y nun punxo torgues, y llamentó que se dixeren munches mentires sobre él.