Nel Díi Internacional de la Muyer Trabayaora, comu nel restu de los díis del añu, Andecha Astur amiéstase con voz propia na denuncia de la represión patriarcal de la muyer asturiana, na so triple vertiente, comu muyer, comu asturiana y comu trabayaora.

El sistema neolliberal continúa afondando ca vuelta más nun sistema patriarcal que se traduz nel retroceso y la perda de drechos y llibertaes que les muyeres tamos careciendo.  La precariedá llaboral, los retayos de servicios y aídes sociales básiques inciden especialmente nes muyeres, que polo xeneral arrecostinamos tamién col llabor del curiáu de les presones mayores y dependientes.

Y si ye cierto qu’ente toes fuimos a parar la involución que suponía la contrareforma de la llei del albuertu, tamién lo ye que tamos bien lloñe d’algamar la reconocencia dafechu de la capacidá de les muyeres de decidir sobro’l nuesu propiu cuerpu, superando llexislaciones más o menos permisives que nun acaben de reconocer los nuesos drechos, siempres en función de los caprichos del gobiernu español de turnu.

Per otru llau la involución idiolóxica tómalo too, dende los medios de comunicación que xeneren y tresmiten una imaxe inaceutable de la muyer, fasta la escuela, onde la igualdá y la coeducación quedaron esaniciaes cola LOMCE, qu’impón un modelu patriarcal de familia, da puxu a la relixón católica y renuncia a una coeducación afeutivo-sesual que permita’l desendolcu presonal d’homes y muyeres llibres y autónomos.

Andecha Astur llama al conxuntu de la sociedá asturiana a participar nes movilizaciones convocaes pa esti díi, y reivindica que la cris económica nun acabe siendo tamién una cris de drechos y llibertaes, desixendo que’l papel de la muyer na nuesa sociedá se dea nun planu d’igualdá y llibertá.