Creada en 1980, la Selmana de les Lletres Asturianes ye una celebración participativa d'homenaxe a los escritores, a les sos creaciones artístiques, a los llectores y al públicu; y ye tamién un homenaxe a la ferramienta comunicativa que fai posible esa lliteratura: la llingua asturiana y, na zona más occidental d'Asturies, el gallego-asturianu.

Esti homenaxe institucional y colectivu a les lletres va llegar anguaño a tola sociedá asturiana ente'l 2 y el 10 de mayu col lema Semar palabres, texer futuru y con actos de bien diversu calter (presentaciones de llibros, llectures públiques, coloquios, concursos escolares o conciertos).

La promoción de los fechos culturales espresaos en llingua autóctona va ser una de les constantes d'esta edición de la Selmana de les Lletres, na que quier otorgase tamién un papel destacáu a la creación lliteraria escolar.

Por ello, los microrrellatos y dibuxos ganadores del «XX Certame de Creación Artística/Lliteraria», nel que pue participar l?alumnáu de los distintos ciclos y etapes educatives, van ser oxetu d'una edición especial. El llibru, que va llevar el títulu Blimes nueves, bringas novas, va distribuyise de baldre?l día 8 de mayu (Día del Llibru Asturianu) en más de cincuenta llibreríes de la rexón.