El secretariu xeneral del PSOE, Pedro Sánchez, afirmó esti xueves que'l so programa electoral va incorporar "abrir les llistes güei zarraes", unu de los sos compromisos pa rexenerar la vida democrática que cree que precisa España y que pasa tamién per que'l PP dexe'l poder. "Acabóse'l tiempu de Rajoy", proclamó.

   Asina se pronunció'l líder de los socialistes nel Foru Líderes entamáu pola axencia EFE y KPGM, onde recordó dalgunos de los sos compromisos electorales que foi esbillando nos últimos meses.

   Ente ellos ta'l d'abrir les llistes, una midida que'l PSOE vien defendiendo dende va tiempu y que s'incluyó nel acuerdu soscritu'l pasáu payares con Tresparencia Internacional. Entós, comprometióse a promover un paquete de midíes llegales ya institucionales qu'incluyera modificar la llexislación y el sistema electoral pa establecer "llistes desbloquiaes o abiertes".

   Amás, volvió repitir el so compromisu de despolitizar el nomamientu de los miembros d'órganos reguladores ya institucionales, como'l Tribunal de Cuentes y el Conseyu Xeneral del Poder Xudicial.

   Sánchez defendió que n'España tien que "cambiar la forma de facer política" y, ente otres coses, hai que "prestixar otra vuelta'l llabor del Congresu de los Diputaos". Porque, calcó, "nun pue ser que'l Gobiernu refugara 61 comparecencies de ministros" o que "renuncie a tou diálogu" y llexisle "a golpe de decretu-llei", de los que yá van 64 nestos trés años.