La Xunta Estudiantil Asturiana criticó l'usu sexista de la imaxe de la muyer qu'al so entender realízase nel cartel qu'anuncia la folixa de la 'Renovena de Químiques', una actividá entamada polos estudiantes pa llograr fondos pal so viaxe d'estudios.

   L'eventu va tener llugar el 7 de marzu na discoteca 'El Jardín' de Xixón. L'anunciu, que yá se ta espardiendo peles facultaes de la Universidá d'Uviéu y redes sociales, muestra a una moza que visti un 'short' y enseña escote.

   El colectivu considera'l cartel un exemplu del usu de "la imaxe de la muyer, con intereses sexuales, como reclamu pa llograr beneficios económicos".