La alcaldesa d’Avilés, Pilar Varela, inaugura mañana martes nel Palaciu de Valdecarzana (19:30 hores) la esposición “N’el falar de la mio tierra. Vida y obra de Gabino Muñiz García-Robés (1884-1966)”.

L’amuesa recueye’l material bibliográficu y personal del escritor avilesín conocíu como “Manín de La Llosa”. Tará espuesta al públicu hasta’l 13 de marzu de 11:00 a 14:00 hores.

A la inauguración asistirán, tamién, el conceyal de Cultura, Román Álvarez; la responsable de la Estaya de la Llingua de Avilés, Montserrat Machicado; la direutora xeneral de Política Llingüística del Gobiernu d’Asturies, Ana Mª Fueyo Llaneza, Jose Ramón Iglesias Cuevas, miembru de númberu de l’Academia de la Llingua Asturiana,  Santiago Caravia, xefe de la seición de bibliografía asturiana de la Biblioteca de Asturias “Ramón Pérez de Ayala”, Ricardo Fernández, responsable del Palaciu de Valdecarzana y autor de la gráfica de la esposición, Benjamín Lebrato, direutor de la revista El Bollo, Borja Riestra, como representante del Muséu Urbanu d’Avilés y la sobrina nieta del escritor, Carmen Muñiz Iglesias.  

La esposición ta compuesta por  material bibliográficu, fotográficu y personal que la familia del escritor donó al Conceyu d’Avilés.

Esta ye la valoración que del material bibliográficu fai’l personal téunicu de la Biblioteca d’Asturies: "Los manuscritos constituyen la parte numéricamente más importante de la coleición. Tamién ye la parte más valiosa y interesante de la mesma. Correspuenden a tola obra espublizada del autor más delles pieces adicionales. Pola so propia naturaleza, son exemplares únicos, poro,  especialmente importantes, (....) d’un gran interés p’Avilés y p’Asturies".