Cuba y Estaos Uníos retomen esti vienres en Washington les conversaciones pa normalizar los vínculos billaterales coles mires de dar pasos concretos pa restaurar les relaciones diplomátiques lo primero posible.
Les negociaciones volverán tar encabezaes pola subsecretaria d'Estáu pal Hemisferiu Occidental, Roberta Jacobson, per parte de Washington, y pola directora xeneral pa Estaos Uníos, Josefina Vidal, per parte de L'Habana.
La delegación cubana alcuéntrase dende'l miércoles de tarde (hora local) na capital estaounidense pa "dar continuidá al diálogu sobre'l restablecimientu de relaciones diplomátiques y l'abertura d'embaxaes", informó'l Ministeriu d'Esteriores.
El platu fuerte d'esti alcuentru va ser la propuesta de Cuba d'entainar la normalización de les relaciones diplomátiques --lo que facilitaría la entrada de les empreses estaounidenses na isla caribeña-- a cuenta d'escluyila de la llista de países patrocinadores del terrorismu.
El 'númberu dos' de Vidal, Gustavo Machín, esplicó a la prensa que la intención de Cuba ye que'l Gobiernu de Barack Obama faiga un anunciu oficial nesti sen antes del Conceyu de les Américas, que va celebrse ente'l 10 y el 11 d'abril en Panamá.
"Col anunciu va ser abondo", indicó, mostrándose consciente de que la salida de Cuba d'esta 'llista negra' va requerir tiempu. Obama tendría qu'informar al Congresu, anque esta notificación nun alquiriría calter oficial hasta 45 díes dempués, pa entamar un procesu de polo menos seis meses.
Cuba incluyóse na llista de países patrocinadores del terrorismu en 1982, pola so adhesión a los movimientos guerrilleros de la Guerra Fría. Los últimos informes citen el so apoyu a ETA y les Fuerces Armaes Revolucionaries de Colombia (FARC).
Foto: MINISTERIO DE EXTERIORES DE CUBA
