El voceru d'ERC nel Congresu, Alfred Bosch, alvirtió esti miércoles al presidente del Gobiernu, Mariano Rajoy, que tres la victoria de les fuerces independentistes nes elecciones catalanes del próximu 27 de setiembre aplicaráse una fueya de ruta pa la constitución de la "República catalana" y asina fairán "un país meyor, más xustu y más prósperu".
"Reconoza qu'el 27S va celebrase un referendu d'independencia, pa que puea votar tol mundu, los del sí y los del non, y qu'hasta los sos simpatizantes dirán votar. A partir d'ehí, si ganamos los del sí, vamos aplicar una fueya de ruta pa la constitución democrática de la República catalana", afirmó Bosch mientres el so discursu nel Alderique sobre l'estáu de la Nación.
El voceru republicanu considera que'l presidente faló na so intervención inicial de "un país maraviyosu que remonta a grandes reblagos" y que, coles mesmes, "llaméntase de la velea catalana", polo que-y respondió que lo tien "bien fácil", y por ello encamentó-y que "suelte llastre, esa carga tan enorme". "Independícese", encamentó-y.
"Seguro que vamos siguir siendo grandes amigos. Usté nel reinu maraviyosu del Candy Crush y yo de vuelta a Barcelona, que ye onde pertenezo. Adiós, Mariano Rajoy, adiós. El 27S vamos facer un nuevu país meyor, más xustu y más prósperu. Vémonos na ONU. Bon vent i barca nova", manifestó.
NUN AFITÓ LA CONVIVENCIA
El voceru del PNV Aitor Esteban, reprochó al presidente que dexara "pasar la oportunidá" d'afitar la convivencia nel País Vascu y llamentó que siga siendo "rehén del so pasáu, lo mesmo como lo ye l'entornu político-social d'ETA".
Mientres la so intervención, Esteban sorrayó que "la paz ye más que l'ausencia de violencia y la convivencia ye más que la paz", polo qu'agora ye necesario "restañar les firíes" de la sociedá vasca tres 30 años de terrorismu. "Sicasí, perdió usté, inesplicablemente, tola llexislatura sin tratar esti llabor", díxo-y al presidente.
El voceru del PNV pidió movimientos a unos y a otros: a ETA, "el so desarme y "la reconocencia del dañu inxustu causao", y al Gobiernu, "otra política penitenciario" y que ponga fin al réxime "d'esceición xudicial" y se promueva l'averamientu de presos, porque ye'l momentu d'actuar "con intelixencia y magnanimidá".
Según el PNV, Euskadi nunca tuvo na axenda del Gobiernu, que trató con "indiferencia" al Executivu d'Iñigo Urkullu cuando ésti plantegó-y, "nun espíritu constructivu", les cuestiones que-y preocupen. "Dio la callada por respuesta", añadió.
DISPERSIÓN DE PRESOS
El voceru de la coalición abertzale Amaiur, Sabín Cuadra, acusó al presidente del Gobiernu d'imponer una "Francocracia" y refirióse a la situación de los presos d'ETA pa calificar como "sadismu" la política de dispersión. Nesi sen, añadió que l'Executivu "desperdició un añu p'avanzar hacia la paz" y que "la única violencia que queda n'Euskal Herria ye la de la Policía y la Guardia Civil".
"Namás queda la violencia del Estáu, de la Guardia Civil y la Policía, esto ye lo qu'hai: illegalizaciones, tortura, cárcel, dispersión", denunció. "Ye una pena que fuera un añu esbardiáu pa la paz y la normalización democrática. Dieron dellos pasos p'atrás. Buscaron españar el procesu porque taben más cómodos nel conflictu violentu que-yos permitía tapecer los sos rotos. Frente a la so vía ta la vía de la reconocencia de toles víctimes y violencies", defendió.
Cuadra refirióse con estes palabres a la situación tres el cese definitivu de la violencia d'ETA, magar la mayor parte de la so intervención tuvo marcada pola cuestión económica. El voceru abertzale cuestionó la recuperación que proclama'l Gobiernu "¿Recuperación pa quién?", preguntóse, de la que denunció que les empreses del IBEX "siguen forrándose", mientres "los salarios tán perdiendo poder alquisitivu" y "nun hai más paru y probeza porque la xente marcha".
