El xuez de l'Audiencia Nacional Pablo Ruz abarrunta que la casa de Baqueira Beret (Lleida) na que l'extesoreru del Partíu Popular (PP) Luis Bárcenas entama esti vienres les sos primeres vacaciones dende que recuperó la llibertá'l pasáu 22 de xineru pagóse, polo menos en parte, con dineru procedente de la 'caxa B' de la formación.

   Según consta nes dilixencies del 'casu Gürtel' y nes de la pieza separada sobre la contabilidá B del PP, a les que tuvo accesu Europa Press, Bárcenas utilizó 149.000 euros en negro qu'estrayera de la 'caxa B' pa pagar la so residencia en Baqueira, ubicada a los pies de la estación d'esquí.

   L'extesoreru sacó presuntamente esti dineru pa que la so muyer, Rosalía Iglesias, mercara acciones de Libertad Digital nel procesu d'ampliación de capital qu'esti mediu de comunicación realizó nel añu 2004. Iglesias alquirió 149.600 euros n'acciones anque dempués vendió los títulos "sin que conste qu'esi dineru retornara a les arques del partíu", según detallaba'l xuez Ruz nun autu dictáu n'ochobre pasáu.

   Na causa tamién obra un informe del bancu Santander nel que se detalla que Rosalía Iglesias ingresó'l 12 d'abril del 2005 nuna sucursal de Barcelona 149.000 euros a favor de la inmobiliaria Neu 1500 SL, qu'edificó la urbanización na estación d'esquí na que Bárcenas ya Iglesias tienen la vivienda. Por esta operación la Fiscalía Anticorrupción acusa al matrimoniu d'un delitu d'apropiación indebida.

   La casa, que ta ubicada nel conceyu ilerdense de Naut Arán, ta embargada dende'l branu del 2013 anque eso nun imposibilita el so usu per parte de los sos tovía propietarios. El responsable del Xulgáu Central d'Instrucción númberu 5 ordenó la confiscación de los bienes del extesoreru y la so muyer pa que cubrieren les fiances de 43,2 y 6 millones d'euros, respectivamente, que podríen imponése-yos nun xuiciu en conceptu de responsabilidá civil.