Enrique González Macho dimitió como presidente de l'Academia de Cine "por motivos personales", según anunció esti xueves la institución nun comunicáu.

   La so dimisión presentóse esti xueves, nuna reunión de la Xunta Directiva de la institución. La Xunta Directiva de la entidá decidió nomar a Antonio Resines y Judith Colell como presidente y vicepresidenta primera en funciones.

   El 24 de mayu del 2014, González Macho salió reelixíu máximu responsable de l'Academia. Nel so segundu mandatu al mandu de la entidá taba acompañáu pol actor Antonio Resines y la directora y guionista Judith Colell, escoyíos nos cargos de vicepresidente primeru y segunda, respectivamente.

   L'agora expresidente de l'Academia manifestó, en declaraciones a Europa Press, que se trata namás de "motivos personales" y, preguntáu sobre si se trata d'una decisión tomada mientres les últimes selmanes, indicó que mañana va esplicar ante los medios de comunicación les razones que lu llevaron a dexar l'Academia.

   El distribuidor, exhibidor y productor González Macho sustituyó a Álex de la Iglesia al mandu de l'Academia n'abril del 2011, unes elecciones a les que se presentó tamién como candidatu'l fináu cineasta Bigas Luna.

   En febreru del 2014 anunció la so decisión de nun volver presentase como candidatu, anque malpenes dos meses dempués anunció que sí optaría a la reelección, una posibilidá que siempre dexó abierta si había "una llocura" o les candidatures finales nun yeren de la so preste, dao que'l so oxetivu yera "defender a l'Academia", tal como aseguró a Europa Press.

   A lo último, el 24 de mayu del pasáu añu salió reelixíu como presidente frente a la única candidatura de la productora Piluca Baquero, una etapa qu'empezó col ánimu de "apagar los rescaldos que s'aviven día ente día" y que queden "ayenos" a les posibilidaes d'actuación de la institución que se disponía a presidir mientres los siguientes trés años.

   Ente ellos, González Macho destacó dos esenciales: el marcu llegal del cine, dao que'l sector "alcuéntrase nel aire" dende fai "casi trés años", asina como la piratería. Nesti sen, l'agora expresidente de l'Academia yá manifestó en declaraciones a Europa Press malpenes dos meses dempués del so nomamientu nel 2011 qu'una salida pal futuru del cine podría pasar pel espardimientu llegal n'internet, anque pa ello diba ser necesario lluchar contra l'espardimientu illegal de conteníos.