La negativa de Berlín prodúxose malpenes poques hores dempués de que llegara la carta del ministru griegu de Finances, Yanis Varoufakis, al Eurogrupu cola solicitú oficial d'una prórroga de seis meses del rescate. Na carta, el nuevu Gobiernu de Syriza comprometióse a pagar la deuda y a nun adoptar midíes unillaterales que pongan en riesgu les metes fiscales y acepta la supervisión de la troika, no que supón una marcha atrás nes sos posiciones anteriores y un averamientu a les esixencies del Eurogrupu.

   La carta d'Atenes nun ye una propuesta que conduza a una solución sustancial", según dixo'l voceru del ministeriu alemán de Finances, Martin Jaeger, nun cortu comunicáu. "En realidá, va na dirección d'una financiación ponte, ensin respetar les esixencies del programa. La carta nun cumple los criterios acordaos pol Eurogrupu'l llunes", acaba la corta declaración.

   La negativa alemana cuestiona tamién la decisión del presidente del Eurogrupu, Jeroen Dijsselbloem, de convocar una nueva xunta estraordinaria esti vienres en Bruxeles, la tercera en dos selmanes, pa examinar el pidimientu griegu, daqué que dixo que namás asocedería si vía posibilidaes d'acuerdu. "Tovía esperamos un alderique seriu sobre delles cuestiones, d'otra manera l'Eurogrupu podría ser una teleconferencia", esplicaron fontes europees.

   Juncker caltuvo "intenses conversaciones" lo memos con Dijsselbloem como col primer ministru griegu, Alexis Tsipras, "ayeri, mientres la nueche y tamién esta mañana (pol xueves)", según esplicó'l so voceru, Margaritis Schinas. El voceru refugó sicasí precisar si Juncker tamién tuvo en contactu col Gobiernu alemán y nun quiso analizar el 'non' de Berlín.

   "El presidente Juncker ve nesta carta un signu positivu que na so opinión podría sentar les bases pa un compromisu razonable n'interés de la estabilidá financiera na eurozona nel so conxuntu", dixo Margaritis. Juncker "namás tien un plan A" y "la so única preocupación ye facilitar un acuerdu a 19", añadió.