La ministra d'Asuntos Esteriores de Venezuela, Delcy Rodríguez, respondió al so homólogu español, José Manuel García-Margallo, que'l so Gobiernu puede da-y al Executivu español "munches llecciones" en "materia social", de "llibertaes" y de derechos esenciales".

   "Bastantes problemes tien el gobiernu d'España de los que responder ante los sos ciudadanos y de los más precisaos que güei muerren por nun tener un techu onde abellugar les sos esperances. Munches llecciones tenemos pa da-y en materia social y en llibertaes y derechos esenciales", aseguró la cancillera venezolana, nuna cadena de mensaxes publicaos na so cuenta oficial de la rede social Twitter.

   Rodríguez realizó estes declaraciones dempués de que'l xefe de la diplomacia española asegurara que les llibertaes d'opinión y prensa nun estáu democráticu y de Derechu como ye España son "irrenunciables". La cancillera venezolana respondió que l'Executivu que lidera Mariano Rajoy tien de tener respetu a Venezuela.

   "Canciller García-Margallo, escaeció que yá los espeyinos nun son esportables nesta tierra de llibertá, patria de Bolívar y Chávez", aseguró Rodríguez. La xefa de la diplomacia venezolana criticó que'l Gobiernu español rescate banqueros con dineru público dexando "sin atender les necesidaes esenciales de los más afectaos socialmente".

   "Plantégo-y, Canciller, que dea una mirada per esos asuntos en cuenta de rindir pleitesía a la tiranía mediática que pretende torganos", afirmó la ministra venezolana. "Que-yos quede claro, al club d'amigos del torcedor de brazos, qu'anden con declaraciones insulses sobre la nuesa Patria. ¡Venezuela respétase!", insistió.