El presidente d'Osasuna, Luis Sabalza, almitió que'l club ta sometíu a una auditoría dende'l pasáu mes de payares pa esclarar "salíes rares de dineru n'efectivo" nes cuentes de la temporada pasada, cantidá que cifró en redol a 1,5 millones d'euros, anque aseguró que nun se pue falar de "compra de partíos" colos datos de los que dispón, avisando que l'anterior Xunta Directiva va tener que "apechugar col pasáu" cuando s'esclare lo asocedío.

   "Son ciertes les salíes de dineru que puen nun tar demasiáu bien xustificaes, un millón y mediu d'euros salieron de forma estraña en dineru contante y sonante, pero nun podemos falar de compra de partíos, nun tenemos constancia d'eso", apuntó Sabalza en rueda prensa, dempués de que'l diariu Marca informara esti martes de la supuesta compra d'un partíu. Foi un duelu contra l'Espanyol de la temporada pasada qu'acabó n'empate (1-1) en plena engarradiella por una salvación qu'a lo último nun llegó pal "club 'rojillo".

   "La responsabilidá ha ser de persones concretes, non del club. El pasáu hai qu'asumilu y hai que apechugalo. Pue haber alguna actuación civil o penal y si daquién fizo daqué mal vamos dir contra los que s'apoderaron del patrimoniu del club, si hai'l más mínimu niciu de qu'eso pue ser. Nun vamos dexar nada, nin polo civil nin polo penal. Nun se trata de ganar, trátase d'esclarar l'asuntu", recalcó'l presidente.

   Sabalza, que llegó a la presidencia del club navarru'l pasáu mes d'avientu, esplicó que'l Ministeriu d'Educación, Cultura y Deporte, xunto col Conseyu Superior de Deportes (CSD), avisó'l 13 de payares a Osasuna de que se-y diba realizar una auditoría na que se diba a "pidir un analís detalláu recalcando nos movimientos de tesorería nos trés últimos exercicios", y que cinco díes dempués presentáronse nel club los trabayadores de la empresa BDO Auditores.

   "Dende'l primer momentu collaboramos en que se realice sin tapecer nada de nengún documentu que'l club tuviera. Entendimos qu'había qu'esclarar les coses, que per parte d'Osasuna nun habría nengún tipu de problema. Collaboramos absolutamente en tolo que pidió l'auditoría, dende facilitar la información hasta solicitar a les distintes persones que contestaren a lo que solicitaba l'auditoría. Si hai que ser parte activa, esti club va ser parte activa onde seya necesario", avisó.