El titular del Xulgáu d'Instrucción númberu 3 de Palma, José Castro, acordó abrir una nueva pieza nel marcu del casu Palma Arena, el númberu 28, coles mires d'investigar la financiación presuntamente illegal del PP balear según la compra y reforma de la so sede, que los sos pagos diríen al cargu d'empresarios favorecíos cola axudicación de delles obres públiques mientres la última llexislatura de Jaume Matas (2003-2007).
Asina lo determinó'l xuez per mediu d'un autu dictáu esti vienres, nel que cita amás a declarar como testigu, el próximu día 24, al exconceyal d'Urbanismu Javier Rodrigo de Santos, que'l pasáu añu realizó una confesión sobre estos fechos. Castro da asina respuesta a la documentación presentada ayeri pol fiscal anticorrupción Pedro Horrach, qu'entregó factures relatives a la reforma del inmueble.
Na so resolución, Castro señala cómo examinaos los documentos apurríos por Horrach, ente los que ta la mesma declaración qu'efectuó Rodrigo de Santos, "apréciase aquéllos, con independencia del resultáu al que pudieren tener, contienen imputaciones sbre una posible financiación illegal del PP" y qu'éstos fechos "podríen rellacionase con contrataciones públiques de les que pudieren ser destinatarios los sos benefactores".
Circunstancies que, añade, de ser ciertes "constituyiríen delitu" que guardaría analoxía colos que son yá oxetu d'investigación na causa. Nel so senu'l maxistráu busca dende hai más de cinco año si delles empreses financiaron de forma irregular les campañes electorales del PP del 2003 y 2007, mercantiles que de la mesma resultaron favorecíes con contratos públicos.
El xuez tien coles mesmes en cuenta les manifestaciones efectuaes nesti sen pol extesoreru del PP nacional Luis Bárcenas mientres la comisión d'investigación del hospital de Son Espases nel Parlament balear, na que, al traviés de videoconferencia, afirmó qu'un empresariu gallegu, Antonio Pinal, presidente de Bruesa, collaboró na alquisición y financiación de la sede del partíu xunto con otros empresarios.
De la mesma cuenta, Castro tien en cuenta los interrogatorios efectuaos al constructor Juan Serra, que reconoció recibir dineru negro na sede del PP, qu'él mesmu reformó -hasta 70.000 euros en metálico y sin factura al traviés del extesoreru Fernando Areal-, asina como al alministrador de la empresa Over Marketing, Daniel Mercado, que declaró de la mesma pactar con Matas poder cobrar parte de los gastos de les campañes electorales en dineru opaco al fiscu.
Mercado manifestó hasta qu'existía l'acuerdu col exministru de que parte de los gastos que se debíen cobrar en negro y a lo último nun se cobraron, quedaríen compensaos col volume d'axudicaciones de contratos públicos que se-y prometíen.
Ello ye qu'esplicó cómo Areal establecía los pagos en dineru A y B, magar nuna ocasión foi Rodríguez el qu'efectuó'l pagu de dineru negro nes antigües oficines del partíu. "Pero lo mayor de los pagos en negro facíalo Areal, al que supongo que Matas yá-y dio instrucciones", apuntó nel so día'l declarante.
Los fechos qu'arrodien a Over (pal so beneficiu arreglaríense dellos espedientes de contratación), tán precisamente investigándose nel marcu de la pieza 27 del casu, considerada la caña de la trama Gürtel en Baleares. Nesti flecu tán imputaos tanto Matas y Areal, como l'exdelegáu del Gobiernu nes isles y actual presidente del PP de Palma, José María Rodríguez, l'expresidente del Parlament Pere Rotger.
