El presidente de Rusia, Vladimir Putin, anunció esti xueves pela mañana, tres casi 16 hores de conversaciones colos sos homólogos d'Ucrania, Francia y Alemaña, un acuerdu pa tratar de poner fin a la violencia nel este d'Ucrania.

   El pactu contempla una serie de condiciones lo mesmo pa los separatistes prorrusos como pa les autoridaes de Kiev y establez la entrada en vixencia d'un altu'l fueu incondicional dende la medianueche del sábadu al domingu, asina como la retirada de tola artillería pesao nel este d'Ucrania.

   L'acuerdu, fechu públicu pol Kremlin na so páxina web, compónse de 13 puntos principales, que son los siguientes:

   1. Un altu'l fueu darréu ya incondicional nes rexones de Donetsk y Lugansk, nel este d'Ucrania, qu'entra en vixencia a les 0.00 hores del próximu domingu, 15 de febreru.

   2. La retirada de toles armes pesaes por dambos bandos pa crear una zona de seguridá. La retirada del armamentu pesao va empezar a de magar el segundu día del altu'l fueu y va tener que completase nun periodu de 14 díes.

   3. Garantizar el siguimientu eficaz y la verificación del altu'l fueu y la retirada d'armes dende'l primer día per parte de la Organización pa la Seguridá y la Cooperación n'Europa (OSCE), col usu de tolos medios necesarios, incluyíos los satélites, aviones sin tripular y sistemes de radar.

   4. Entamar un diálogu sobre'l futuru estatus llegal de les rexones de Donestk y Lugansk. Nel plazu de 30 dende la firma del acuerdu, la Rada Suprema d'Ucrania tendrá qu'adoptar una resolución sobre'l réxime especial de Donetsk y Lugansk, basándose no acordao nel pactu de Minsk de 19 de setiembre del 2014.

   5. Concesión d'indultos y amnistíes y la promulgación d'una llei que prohíbe la persecución y el castigu de les persones rellacionaes con incidentes nes rexones de Donetsk y Lugansk.

   6. Intercambiu de rehenes según el principiu 'toos por toos'. Garantizar la lliberación y l'intercambiu de rehenes y deteníos por dambos bandos. Esti procesu tien que completase nel plazu de cinco díes dende la firma d'esti acuerdu.

   7. Creación de corredores humanitarios. Facilitar un accesu seguru, la entrega, l'almacenamientu y la distribución d'ayuda humanitario a les persones precisaes, sobre la base d'un mecanismu internacional.

   8. Determinación de les modalidaes pa la restauración de les midíes socio-económiques en Donetsk y Lugansk, incluyíes les pensiones y otros pagos. Con esti fin, Ucrania recupera'l control del so sistema bancariu nes zones afectaes pol conflictu.

   9. Restaurar un control total sobre la frontera d'Ucrania con Rusia per parte de les fuerces de Kiev, un procesu que tien qu'empezar tres la celebración d'elecciones llocales y que va completase tres un acuerdu políticu, que va incluyir elecciones llocales en Donetsk y Lugansk y una reforma constitucional sobre estes dos rexones a últimos del 2015, too ello nel marcu del Grupu de Contactu, formáu por Ucrania, Rusia y la OSCE.

   10. Retirada del territoriu ucranianu toles fuerces militares estranxeres, los sos equipos y los mercenarios, baxo la supervisión de la OSCE, asina como'l desarme de tolos grupos illegales.

   11. Una reforma constitucional que tendría qu'entrar en vixencia a últimos del 2015 y que tendrá que ser un elementu clave na descentralización del país, teniendo en cuenta les característiques concretes de les rexones de Donetsk y Lugansk, asina como l'aprobación d'una llei definitiva sobre l'estatus especial d'estes dos provincies.

   12. Celebración d'elecciones llocales nes rexones de Donetsk y Lugansk, acordaes nel marcu del Grupu de Contactu.

   13. Supervisión del cumplimientu de los puntos del acuerdu per parte del Grupu de Contactu (Rusia, Ucrania y OSCE).