Un total de 16 guardias civiles van tener qu'emprestar declaración en calidá d'imputaos ante'l Xulgáu d'Instrucción númberu 6 de Ceuta polo asocedío'l 6 de febreru del 2014 xunto a la playa ceutina d'El Tarajal, onde polo menos 15 migrantes perdieron la vida intentando algamar a nadu suelu español mientres axentes del Institutu Armáu disparaben pelotes de goma y botes de fumu p'aventalos.

   Nel resolución, a la que tuvo accesu Europa Press, la xueza cita a declarar a un total de 16 axentes, que tendrán que comparecer de cuatro en cuatro ente'l 3 y el 11 de marzu ante'l xulgáu, que retoma asina la instrucción de la causa dempués de que l'Audiencia Nacional refugara facese cargu de la mesma por considerar que'l tribunal ceutín tenía competencies pa facelo.

   Los citaos a declarar son un capitán de la Guardia Civil, un sarxentu, un teniente y trece guardies civiles que tuvieron presentes la mañana de los fechos nel esplegue policial entamáu na playa d'El Tarajal.

   La citación fai referencia al artículu 118 de la Llei d'Enxuiciamientu Criminal, el mesmu que regula'l derechu de defensa ante la imputación por un actu punible, esto ye, que los guardies civiles van declarar en calidá d'imputaos.

   La instrucción abrióse pa investigar un presuntu delitu d'homicidiu por imprudencia y trátase de resolver si l'actuación de les fuerces de seguridá na playa aquella mañana tuvo relación causa efectu coles muertes de polo menos cinco migrantes, a los que se sacó del agua muertos en zona española.

   Ye la primer vez dende qu'entamaren les actuaciones xudiciales a instancies d'un grupu d'ONG ente les que figuren la Coordinadora de Barrios y CEAR, qu'axentes de la guardia civil van comparecer ante'l xulgáu.

   Hasta'l momentu, la maxistrada tuviera conocencia de la so versión de los fechos per mediu d'un informe ellaboráu pola Policía Xudicial de la Comandancia na ciudá autónoma qu'arrexuntaba declaraciones de los presentes aquella mañana n'El Tarajal, documentu adelantáu por Europa Press.

   El testimoniu del capitán llamáu agora a declarar, actual Capitán Xefe de la Unidá de la Compañía Rural de Seguridá de Ceuta, figuraba naquel informe. Foi, según él mesmu relató, que xestionó la entrega a Marruecos de los 23 migrantes que llograron llegar hasta la playa española per mediu de la puerta de serviciu de la valla.

EL CAPITÁN QUE DISPARÓ PA DAR EXEMPLU

   Esti capitán declaró que cuando llegó a la zona del espigón yá había axentes esplegaos tanto de la so compañía como de los GRS de Sevilla y sonaben "detonaciones", mientres los inmigrantes axuntábense na punta del espigón "creando un embudu".

   Dixo tamién que se dirixó hasta l'espigón d'El Tarajal y ellí mesmo pidió "un fusil a un axente y delles pelotes" colos qu'efectuó dellos disparos, en "un actu reflexu" pa que'l restu de los axentes "vieren que'l so xefe implicábase como ellos n'intentar evitar el pasu de la frontera" y da-yos exemplu, pues "una vez fizo los disparos devolvió l'arma entendiendo que los guardies civiles qu'ellí taben entendieren la manera d'usales".