Berlín (Europa Press).-El ministru griegu de Finances, Yanis Varoufakis, que participa esti miércoles xunto colos homólogos de la eurozona nuna xunta estraordinaria pa tratar la situación del país helenu, desveló que'l so Gobiernu cuenta con un llistáu nel que, amás del bancu HSBC en Xinebra, apaecen otres entidaes qu'ayudaron a refugar les sos obligaciones fiscales a ciudadanos griegos.
"La llista Lagarde namás implica a un bancu, nós tenemos una llista de tolos bancos y toles tresferencies", alvierte'l ministru, que nuna entrevista concedida al selmanariu 'Stern' desvela que los emplegaos del so departamentu recibiero provisión por altes instancies" pa que nun investigaren esos casos.
"Agora contamos con una base de datos bien bona y sabemos exactamente cuánto capital se tresfirió dende Grecia y depositóse en cuentes n'Europa y otres partes del mundu", asegura Varoufakis. "Polo menos eso ye lo que me dixo la xente del mio departamentu. Sabría les cifres exactes si nun tuviera que tar viaxando per Europa pidimiando más espaciu p'alendar", añade.
Neti sen, el ministru helenu comenta casos nos que se tresfirieron 1.500 millones d'euros a cuentes nel estranxeru mientres los últimos 20 años, mientres se declararon impuestos por 5.000 euros. "¿Cómo ye posible? Estes llistes existieron, pero nunca s'utilizaron", sentencia.
D'esta manera, Varoufakis caltién que l'Executivu lideráu por Alexis Tsipras ye'l primer Gobiernu griegu que realmente quier acabar colos cárteles nel país helenu y espresa la necesidá de contar cola collaboración d'Alemaña.
"Vamos estrapallalos (...) anque tovía nun sé cómo", afirma'l ministru griegu, que considera que'l Gobiernu anterior namás asonsañó tar interesáu en reformes y cree que les lleis fiscales del país helenu apurríen una suerte d'inmunidá fiscal a los que teníen de gravar. "Como preguntar a los pavos si quieren que los sacrifiquen pa Navidá", esplica.
Nesti sen, Varoufakis recuerda que tuvo qu'emigrar a EEUU en recibiendo la so familia amenaces de muerte nel 2011 pola so collaboración con dellos medios na investigación d'escándalos bancarios nel país.
