El coordinador federal d'IU, Cayo Lara, acusó esti llunes al líder de Podemos, Pablo Iglesias, de tener los mesmos principios que l'actor Groucho Marx --"si nun te presten éstos tengo otros"-- y alvirtió que Podemos quier facer una OPA "contraria" a la so organización.

   En rueda prensa, Cayo Lara mostróse bien críticu con Podemos dempués de qu'esti sábadu Iglesias acusara a IU de vivir "bien cómoda" como partíu bisagra. "Vívese bien cómodu fiel a los tos principios inamovibles sabiendo que vas ser minoritariu", dixo'l líder de Podemos.

   Nesti sen, Lara dexó claro qu'él nunca criticaría a naide por tener principios y recalcó qu'IU "tien los principios de la izquierda" y asina va siguir calteniéndolos "porque'l fin nunca xustifica los medios". "Da la impresión de qu'algunos namás tienen los principios de Groucho Marx, tengo unos pero si nun te presten tengo otros", llamentó.

   Nesti puntu, reconoció qu'IU ye una "fuerza complicada", pero precisamente porque aplica los sos "principios" cuando llega al poder, como aseguró qu'asocedió n'Andalucía. "Nun voi criticar a naide por que diga que s'enferrona a los sos principios", dixo poniendo como exemplu la manifestación de Podemos del pasáu 31 de xineru, onde aseguró tar convencíu de que "había muncha xente con principios".

LOS VOTOS DEL PSOE Y LOS CUADROS D'IU

    Cayo Lara, qu'esti llunes endureció'l so discursu contra Podemos, denunció una "OPA contraria" contra la so formación y reprochó amás que'l partíu de Pablo Iglesias tratara de captar a los militantes d'IU ofreciéndo-yos "el paraísu terrenal". "Quieren los votos del PSOE y los cuadros d'IU", resumió.

   Sicasí, dexó claro qu'IU ye "galgu de llargu percorríu" y va aguantar porque tien "proyectu, programa, proyección de futuru y principios". Nun refugó pactos con Podemos tres les próximes elecciones porque echar al PP de les instituciones ye "una necesidá democrática".