UVIÉU (EUROPA PRESS).-L'escritor Miguel Rojo axunta 32 de los sos cuentos, publicaos periódicamente nos periódicos El Comercio y La Voz de Avilés, nun volume tituláu 'L'amoz suicida', que sal al mercáu n'edición billingüe, editáu por Trabe.

   Rojo presentó'l llibru oficialmente esti vienres pasáu n'Uviéu, nun actu nel que participaron  Diego Medrano, escritor, Juan Falcón, artista, Gema Ramos, ilustradora, y Esther Prieto, d'Ediciones Trabe.

   El llibru atropa 32 cuentos yá publicaos nes páxines d'El Comercio y de La Voz de Avilés. Según la propia editorial, "l'universu ficcional que l'autor remana nestes páxines ye bien ampliu; nél hai espaciu pa lo fantástico y lo costumista, pa lo metalliterario y lo dramático". D'igual manera, el que narra va cambiando de cuentu en cuentu de la primer persona a la tercera, del narrador masculín a la voz femenina que nos cuenta. Según los editores, "nun hai tema dengún que-y seya ayenu a Miguel Rojo, que s'amuesa equí como un escritor de mirada aliella y que ye a trescribir les coses del mundu y de la vida cola maestría y la pureza del narrador avezáu".

   Miguel Rojo (Zarracín, Tinéu, 1957), escritor de reconocíu prestixu nes lletres asturianes, tien yá una llarga trayectoria lliteraria mesmo n'asturianu qu'en castellanu. Conocíu sobremanera como poeta y narrador, los sos últimos poemarios son Territorios -ed. billingüe- (2007) y El paséu (2011). Ye autor de la novela más vendida de la narrativa asturiana del Surdimientu, 'Histories d'un seductor (Memories d'un babayu)' -1993-, que cuenta tamién con versión castellana, igual que la mayoría de les sos publicaciones infantiles: 'De qué tará fecha la lluna' (2008) o 'El viaxe de Tin y Ton' (2008). En castellanu destaquen, amás del relatu 'Raitán el petirrojo' (2003), les noveles 'La senda del cometa' (2007) y 'La hoja del Ginkgo biloba' (2010).