Podemos afirmó esti vienres que'l so 'númberu trés', Juan Carlos Monederu, fizo una declaración complementaria "voluntaria" de los sos ingresos ante l'Axencia Tributaria porque, pa que nun quede nenguna duda, escoyó "la opción más favorable pa la Facienda Pública".

   El partíu confirmó asina que Monedero fizo una declaración complementaria ante Facienda pa declarar como persona física los ingresos que recibió por asesorar a Gobiernos llatinoamericanos y polos que de primeres pagara impuestos al traviés d'una sociedá.

   Eso sí, destacó que la so declaración foi "complementaria voluntaria sin qu'existiera nenguna notificación de Facienda" y que "la existencia d'una declaración complementaria voluntaria implica por llei que nun existe fraude fiscal". Al so xuiciu, dicir lo contrario son palabres "falses y interesaes al serviciu de la disputa política".

   Nun comunicáu, la formación esplicó que Monedero sometióse siempre al asesoramientu de "profesionales" y que "en nengún momentu incumplió les normes que fixa l'Axencia Tributaria". Y remitióse a palabres de los técnicos de Facienda pa dicir que "al abrir la empresa n'España evidenciábase la voluntá de tresparencia y de pagar impuestos nel país".

   Podemos negó dafechu les acusaciones de que Monedero cometiera fraude o que se-y impunxeren sanciones y denunció que quiera dase un "usu político" a esti asuntu. Amás, sorrayó que los inspectores afirmaron delles veces que "nun hubo ánimu de tapecimientu, infracción o sanción dalguna".

   Na mesma llinia, la formación abondó en que primero que Monedero ficiera "esi pagu" nengún organismu xurídicu o tributariu afirmó qu'existiera fraude, falta llegal o sanción alministrativa pa él, y llamentó que se filtraren informaciones pa "semar dudes" mientres él "cumplió sobradamente con toles sos obligaciones con Facienda".

   A lo último, Podemos denuncia qu'a Monedero nun se-y notificó la inspección de Facienda por "calces ordinarios", sinón por axentes d'Aduanes, colo que considera que se buscó "una sobreactuación con fines claramente apavoriantes".