El ministru d'Asuntos Esteriores y de Cooperación, José Manuel García-Margallo, alvirtió esti miércoles de que la mesma Generalitat de Cataluña almitió'l so deséu de dir creando nel estranxeru la infraestructura que precisaría un futuru Estáu independiente.

   En declaraciones a los periodistes nos pasiellos del Congresu de los Diputaos, onde tenía una xunta col Grupu Parlamentariu Popular, el ministru esplicó l'anunciu que fizo esta mañana nuna entrevista en televisión, na que reveló que'l Gobiernu estudia recurrir la inminente abertura de dos nueves delegaciones de la Generalitat en Roma y en Viena, asina como la llei catalana d'acción esterior.

   El xefe de la diplomacia precisó que'l pidimientu formal en relación cola presentación de los recursos correspuénde-y al Ministeriu de Facienda y Alministraciones Públiques.

   Pero señaló que'l departamentu qu'él dirixe fizo llegar a Facienda les sos "preocupaciones" sobre les "posibles vulneraciones" de la Constitución nes que pue incurrir la llei catalana d'acción esterior, per un llau, asina los incumplimientos de la Llei de l'Acción Esterior y del Serviciu Esterior del Estáu que cometería la Generalitat cola so reciente decisión d'abrir delegaciones n'Austria ya Italia.

   El ministru recordó cómo'l conseyeru de Presidencia de la Generalitat, Francesc Homs, reconoció que l'aprobación de la llei catalana d'acción esterior respondía "al deséu" de la Generalitat de "crear les infraestructures necesaries p'atender la voluntá de que Cataluña seya un estáu independiente".

   Esa llei, que ta redactada "con enorme cuidáu", dixo'l ministru, "desconoz" sicasí que la política esterior ye "competencia esclusiva del Estáu" y que la so dirección "correspuende al Gobiernu de la Nación".