El barriu de Yarmuk, en Damascu, yera antes de la guerra una zona relativamente próspera qu'acoyía a la comunidá palestina en Siria. Casi cuatro años dempués del entamu del conflictu, l'área tornó nuna trampa pa 18.000 persones que malviven atrapaes sin comida y con fríu.

   L'axencia de Naciones Uníes pa los refuxaos palestinos (Unrwa) fizo un llamáu urxente ante'l deterioru de la situación en Yarmuk y alvirtió que la zona ta en cantu de la "catástrofe humanitaria".

   Nel 2014, la Unrwa namás pudo repartir alimentos 131 díes, con una media de 89 caxes diaries a pesar de que fairíen falta polo menos 400 pa cubrir les necesidaes mínimes de la población. Amás, nun hai eletricidá, y la mayoría de los civiles atrapaos nun puen aportar a servicios básicos como agua potable, refuxu, atención sanitario o calefacción.

   Un voceru de l'axencia de la ONU, Chris Gunnes, pidió a les autoridaes que "faciliten" el reaprtu d'ayuda ente la población civil, por culpa de que la situación empeore pol "agravamientu" del conflictu armáu.

   Nesti sen, sorrayó que la Unrwa tien capacidá pa distribuyir hasta 1.000 paquetes de comida, pero pa ello fairía falta una mayor collaboración y el cese "darréu de les hostilidáes".

   La situación llegó a un puntu nel que les families tuvieron que recurrir a quemar ropa pa tratar de calecer. Naciones Uníes publicó un videu nel qu'un padre de familia arrodiáu de cuatro neños cuenta a unu de los menores por qué mete prendes na chimenea.

   "Nun tenemos nada pa tar calientes, namás la nuesa ropa", cuenta esti home, que llamenta tamién que l'usu d'estes prendes como fonte de calor supón un focu d'enfermedaes. Les families tamién quemen muebles pa tratar de sobrevivir al iviernu.

SIN COMIDA NIN AGUA

   La Unrwa recoyó testimonios dramáticos como'l de Mahd, incapaz d'alimentar los sos fíos. "Lo más difícil ye cuando se llevanten pela mañana pidiendo lleche y pan y tengo que da-yos rábanu o dalguna verdura, y n'ocasiones tampoco hai", dixo.

   Otra de les histories recoyíes pola axencia ye la d'Aziz, de diez años, que toles mañanes tien que caminar un kilómetru pa llograr agua. Aziz esplicó que dedica "cinco hores al día" a esti llabor, anque namás hai agua "disponible" cada cinco díes.