"Soi bien optimista tres estos discutinios de que vamos pel bon camín. Por supuesto, tovía nun tenemos un acuerdu, pero vamos na bona dirección p'alcontrar un acuerdu viable", aseguró Tsipras nuna corta declaración ante la prensa, sin preguntes, tres la última de les sos xuntes en Bruxeles, col presidente de la Eurocámara, Martin Schulz.
El primer ministru helenu entrevistóse tamién col presidente de la Comisión, Jean-Claude Juncker, y col del Conseyu Européu, Donald Tusk.
"El nuesu oxetivu ye respetar la soberanía del pueblu en Grecia y el claru mandatu de los nuesos ciudadanos y coles mesmes respetamos les regles de la UE. Queremos correxir esti marcu, nun destruyir esti marcu. Y creemos que nesti marcu podemos alcontrar una solución común y viable pa los nuesos ciudadanos, una perspectiva común", aseguró Tsipras.
"Sé mui bien que la historia de la UE ye una historia de desacuerdos, pero n'última instancia, d'acuerdos y pactos. Y tenemos la voluntá de trabayar nesta dirección, trabayar p'alcontrar un acuerdu mutuamente aceptable, un compromisu pal nuesu futuru común", señaló.
Tamién el presidente de la Eurocámara declaróse "bien optimista" sobre les posibilidaes d'acuerdu ente la UE y Grecia. "Quédenmos momentos difíciles, tovía nun tenemos les soluciones necesaries, pero creo que'l primer ministru ta trabayando pola cooperación (con Europa) y non pola separación (de Grecia) y ésti ye'l camín correctu", dixo Schulz.
"Soi bien optimista tres la nuesa xunta sobre'l fechu de que les dos partes tán lluchando por entendese", señaló'l presidente de la Eurocámara. Al so xuiciu, Tsipras ta ofreciendo diálogu a la UE y "el diálogu ye la base pa compromisos y pa soluciones constructives".
Schulz repitió amás el so apoyu a los esfuerzos del nuevu Gobiernu de Syriza pa combatir el fraude y la evasión fiscal. "Los ciudadanos griegos pagaron la factura mientres los últimos años. Agora ye'l momentu en que los que tienen dineru, los que sacaron el dineru del país, contribuyan a la solución de los problemes tamién", apuntó.
