La Corte Internacional de Xusticia refugó les demandes interpuestes por Croacia y Serbia por acusaciones mutues de delitos de xenocidios mientres les guerres de los Balcanes na década de los 90 por considerar qu'ambos países nun demostraron qu'existiera una intención directa d'aniquilar a toa o una parte de la población del país vecín, informaron l'axencia de noticies serbia Tanjug y la BBC.

   Na llectura del primer veredictu, el presidente de la CIX, el maxistráu Peter Tomka, sorrayó que "Croacia nun probó" la so acusación de que Serbia cometiera un xenocidiu, polo que la so demanda "refugóse nel so conxuntu". "Les acciones nun les cometieron cola intención específica que les definiría como un xenocidiu", aseguró.

   N'esponiendo les razones poles que tamién refugó la contrademanda interpuesta per Serbia, Tomka dexó claro que tanto les fuerces croates como les serbies cometieron crimes mientres la guerra pero nun alcontraron pruebes abondo pa confirmar qu'hubiera "una intención concreta" de cometer xenocidiu.

   Na so denuncia, el Gobiernu de Zagreb argumentó que les fuerces militares de l'antigua Yugoslavia cometieron un xenocidiu na población croata de Vukovar n'agostu de 1991, mientres la guerra de Croacia (1991-1995). Darréu, el Gobiernu de Serbia presentó la so propia denuncia pola espulsión de más de 200.000 serbios del territoriu croata mientres el conflictu bélicu.

   Unes 20.000 persones morrieron mientres la guerra de Croacia, qu'empezó tres la secesión del país de l'antigua Yugoslavia. La población croata de Vukovar quedó afarada, tres ocupala mientres trés meses les fuerces serbies en 1991. Decenes de miles de croates tuvieron qu'abandonar los sos llares y a unos 260 d'ellos detuviéronlos y executáronlos.

   Cuatro años dempués, la operación Nube del Exércitu croata bombardió la zona de la Krajina, un territoriu croata con mayoría serbia, lo que llevó a unes 200.000 persones a abandonar los sos llares.