L'Audiencia Provincial de Lleón decretó la llibertá baxo fianza de 10.000 euros pa Raquel Gago, la policía llocal imputada pol crime de la que fuera presidenta de la Diputación de Lleón, Isabel Carrasco, asesinada a tiros el 12 de mayu del 2014.

   L'Audiencia tomó esta decisión tres la vista celebrada esti miércoles dempués de que l'abogáu defensor de l'axente recurriera ante'l tribunal la negativa de la titular del Xulgáu d'Instrucción número 4, Sonia González, a la so puesta en llibertá.

   Asina, según confirmó a Europa Press el mesmu abogáu defensor de la policía llocal, Fermín Guerrero, la imputada podría quedar en llibertá provisional en depositando una fianza de 10.000 euros, en contra del criteriu de la Fiscalía y l'acusación particular. Según l'autu, al que tuvo accesu Europa Press en fontes del Tribunal Superior de Xusticia de Castiella y Lleón (TSJCyL), en faciendo efectiva la fianza y la salida de prisión, tendrá que presentase tolos llunes ante'l xulgáu y aportar el pasaporte.

   Na vista celebrada ante l'Audiencia esti miércoles, Gago repitió la so inocencia y esplicó que nun vio l'arma homicida que Triana Martínez depositara nel so coche tres el tirotéu hasta 30 hores dempués, momentu nel que llamó a la Policía.

   Raquel Gago compareció ante la Sala, onde manifestó que "pasaron munches hores" dende que recibió, según ella sin sabelo, la pistola, y que podía facela desapaecer.

   "Pudo tirala, desfaceme d'ella, pero nun la vi, y cuando la vi llamé a la Policía", insistió mientres la vista, tres la que l'Audiencia decidió estimar el recursu de la defensa pa la puesta en llibertá provisional de l'acusada.

   Na so corta declaración, Gago, visiblemente nerviosa, refirióse al momentu nel que Triana Martínez introduxo nel so coche l'arma homicida, momentu nel que la policía alcontrábase falando con un revisor de la ORA, que tamién emprestó declaración y confirmó esti puntu.

   Raquel Gago aseguró qu'ella nun taba n'actitú d'espera y que foi'l mesmu revisor de la ORA'l que s'averó. "Nun taba esperando, él foi a falar conmigo, dirixóse a mi", afirmó.