Asturiasd (E.P.).-Iniciativa pol Asturianu y Academia de la Llingua reclamaron esti xueves la reconocencia d'oficialidá de la llingua asturiana pa correxir los incumplimientos y violaciones de derechos llingüísticos recoyíos nel informe d'de la Rede Europea d'Igualdá Llingüística (ELEN), de la que forma parte la primera, de cara a la revisión periódica de universal del cumplimientu de los derechos humanos nel Estáu Español. Nel casu asturianu, recuéyense 25 casos de "discriminación".

   El vicepresidente de l'Academia de la Llingua, Xosé Antón González Riaño, y el presidente d'Iniciativa pol Asturianu, Inaciu Galán, presentaron güei esti informe, al tiempu que reclamaron la oficialidá.

   El testu, según esplicó Galán, recueye, en dellos casos como'l catalán, los incumplimientos y violaciones de la DUDH, mayoritariamente cometíos pola alministración española. "Pero nel casu de la llingua asturiana, l'asociación Iniciativa pol Asturianu (miembru d'ELEN) recopiló más de 25 casos de discriminación nos caberos años, mayoritariamente cometíos per parte de l'alministración pública asturiana y alministraciones llocales".

   Estos casos diben dende la decision d'un xuez de nun considerer discriminatoriu multar a estudiantes d'una escuela en Villaviciosa con 25 pesetes por cada pallabra que dicíen n'asturianu, a la negación de les alministraciones llocales a almitir instancies nesta llingua, la negación a un ciudadanu asturianu de declarer na so llingua na Audiencia Nacional, o la falta de regularización de la escolarización en llingua asturiana (particularmente nes etapes pre-escolares y de Primaria).

   Amás d'ello, tamién recoyía, según Galán, la falta ñidia de les sos obligaciones per parte del Estáu español a la hora de facer cumplir a la Comunidá Autónoma del Principáu d'Asturies y a los Gobiernos llocales la llegalidá vixente (Estatutu d'Autonomía y Llei d'Usu del Bable/Asturianu), qu'obliguen a un tratu igualitariu hacia los falantes d'asturianu al respective del tratu que reciben los que s'espresen en castellán.

   A lo cabero, l'informe concluyía que "tolos casos recopilaos a lo llargo'l territoriu español amosaben una discriminación sistemática ya institucionalizada, y que la busca de xusticia al traviés de los (hostiles) xulgaos ta yá escosada, lo qu'afita los pegoyos p'apelar a la Corte Europea de Drechos Humanos y al Tribunal de Xusticia Européu y posiblemente L'Haya", esplicó'l presidente d'Iniciativa.

   El presidente d'Iniciativa esplicó qu'ante esti informe "nengunu de los estaos revisores de la ONU se dignó a formular una sola entruga no tocante a los drechos llingüísticos, lo que dexa a es clares la falta de compromisu real per parte de les Naciones Xuníes hacia un drechu fundamental qu'amás ta recoyíu na Declaración Universal de los Drechos Llingüísticos, ellaborada por esta mesma institución y amestada a la Declaración Universal de los Drechos Humanos".