Barcelona (E.P.).-L'expresidente de la Generalitat Jordi Pujol y la muyer, Marta Ferrusola, salieron del xulgáu de la Ciutat de la Xusticia ente ulles y ante fuertes midíes de seguridá en declarando mientres unes dos hores y cuartu ante la xuez qu'investiga la causa de los fondos tapecíos nel estranxeru sin regularizar mientres más de 30 años.

   La salida prodúxose pasaes les 12.30 hores pela puerta de l'avenida Carrilet del edificiu ente numberosos xiblíos y al berru de '¡Lladrones!' proferíos por dellos ciudadanos que los esperaben na puerta, ante lo que Marta Ferrusola dirixóse cola mirada a unu de los concentraos al que-y fizo un xestu cola mano diciendo que 'non'.

   L'expresidente negóse a facer declaraciones a los periodistes, a los que se llendó a dicir: "les declaraciones fíceles ante'l que tenía que faceles".

   La nube d'informadores y de dellos ciudadanos enzancó'l pasu del matrimoniu, que caminó a pasu lentu y seguru, igual que lo fizo a la so entrada pela puerta principal del xulgáu ante escaos manifestantes, que tamién los recibieron con xiblíos.

   La declaración empezó a les 10.15 hores y acabó sobre les 12.30, cuando l'expresidente abandonó la Ciutat de la Xusticia acompañáu de la so muyer, Marta Ferrusola