L'expresidente de Cuba Fidel Castro volvió apaecer esti llunes con una carta dirixida a la Federación Estudiantil Universitaria (FEU) na qu'asegura que nun confía na política d'Estaos Uníos, selmanes dempués de que L'Habana y Washington anunciaren una meyora nel restablecimientu de les relaciones diplomátiques ente los dos países, rotes dende va mediu sieglu.

   "Nun confío na política d'Estaos Uníos nin intercambié una palabra con ellos", señaló'l líder revolucionariu cubanu, que sicasí añede qu'eso "nun significa un refugu a una solución pacífica de los conflictos". Nesti sen, señaló que siempre va defender "la cooperación y l'amistá con tolos pueblos del mundu". "Ente ellos los de los nuesos adversarios políticos", repostió.

   "Cualquier solución pacífica y negociada a los problemes ente Estaos Uníos y los pueblos o cualquier pueblu d'América Llatina, que nun implique la fuerza o l'empléu de la fuerza, tendrá que tratase d'acordies colos principios y normes internacionales", manifestó'l mayor de los Castro.

   Coles mesmes, esclaró na so misiva que foi'l presidente, Raúl Castro, el que dio "los pasos pertinentes d'acordies a los sos prerrogatives y les facultaes que-y conceden l'Asamblea Nacional y el Partíu Comunista de Cuba".

   "Los graves peligros qu'amenacen güei a la humanidá tendríen que dexar pasu a normes que fueren compatibles cola dignidá humana. De tales derechos nun ta escluyíu nengún país. Con esti espíritu lluché y voi siguir lluchando hasta l'últimu aliendu", sentenció.

Foto: archivo.