El glaciar más grande nel este de l'Antártida, que contién el xelu equivalente a un aumentu de seis metros del nivel del mar, ta derritiéndose pol aumentu de temperatura del océanu.

   Esti gran bloque de xelu, conocíu como Totten, tien 120 kilómetros de llargu y más de 30 kilómetros d'anchu. La so situación tórnalu 'en víctima' de les corrientes templaes. Sicasí, esti trabayu apunta a que l'agua que lu arrodia ye tovía más templada de lo que se creía y los espertos creen que pu tar fundiéndose dende embaxo.

   "Sabíamos que'l glaciar taba 'endelgazando' a partir de los datos llograos per satélite, pero nun sabíamos por qué", esplicó unu de los investigadores que descubrió'l fenómenu, Steve Rintoul, del Australian Climate and Environment Cooperative Research Centre.

   Espediciones anteriores fueren incapaces d'averase al glaciar pol xelu, pero esti equipu de científicos utilizó un potente frayaxelos. Dende les cercaníes l'equipu trató de predicir cómo impactaríen los cambios na temperatura del océanu nes capes de xelu.

   Hasta agora, creíase que la capa de xelu de l'Antártida oriental taba arrodiada d'agües fríes y, poro, bien estables y con poques probabilidaes de cambiar enforma'l paisaxe. Pero los datos recoyíos determinaron que les agües de tol glaciar taben 1,5ºC penriba qu'otres zones visitaes nel mesmu viaxe, mientres el branu del hemisferiu sur.

   Pa Rintoul, el fechu de que l'agua caliente puea llegar hasta esti glaciar, ye una señal de que l'Antártida oriental ye potencialmente más vulnerable a los cambios nel océanu promovíos pol cambiu climáticu de lo que podía pensase.