L'Abogacía del Estáu, dependiente del Ministeriu de Xusticia, pide 60 años y ocho meses de cárcel pal extesoreru del Partíu Popular (PP) Luis Bárcenas y da por "acreditada" la existencia d'una contabilidá paralela o 'caxa B'" nesta formación constituyida por fondos que nun se declararon a Facienda.

   L'escritu, al que tuvo accesu Europa Press, señala que Bárcenas encargóse de la "llevanza", xunto al tamién extesoreru 'popular' Álvaro Lapuerta, d'una 'caxa B' del PP ente los años 1990 y 2008, denominada asina por nun apaecer fixaos los pagos qu'integraríen la mesma nos llibros contables, nin declaraos a la Facienda Pública".

   Los servicios xurídicos del Estáu, qu'acusen a 20 persones namás polos delitos contra la Facienda Pública y otros conexos (como falsedá documental y estafa procesal en grau de tentativa), señalen que mientres el periodu en qu'ocupó'l cargu de xerente del PP y, "prevaliéndose de les funciones que'l mesmu otorgába-y, pudiera ser que (Bárcenas) apoderárase de recursos d'esta formación aprovechando la estructura opaca a la Facienda Pública o doble contabilidá creada, al marxe de la contabilidá oficial presentada ante'l Tribunal de Cuentes".

FACTURACIÓN FICTICIA Y DINERU EN SUIZA

   Otramiente, ente'l 2001 y el 2002 l'extesoreru 'popular' tamién procedió a esviar fondos, esta vez, "lícitos y declaraos a la Facienda Pública, d'entidaes nes qu'intervino pa usos propios, como'l pagu de viaxes y servicios turísticos entamaos pola empresa de Francisco Correa Pasadena Viajes.

   Amás, "con cuenta de tapecer l'orixe y propiedá de les rentes procedentes de l'actividá descrita antes y poder asoleyales desvinculándoles de dichu orixe", Bárcenas utilizó, en "connivencia" cola so esposa, Rosalía Iglesias, dellos procedimientos de facturación ficticia y "una filaza financiera constituyida n'entidaes bancaries suices".

   De la mesma, l'antiguu responsable de les finances populares' dio en "aprucir fondos al reflexalos nes correspondientes declaraciones tributaries como ganancies patrimoniales derivaes d'operaciones de compraventa d'obres d'arte", operativa que tamién utilizó Rosalía Iglesias pa "aprucir recursos propios".

16 COOPERADORES DEL DELITU

   L'Abogacía del Estáu dirixe la so acusación contra cuatro autores de los delitos fiscales: Bárcenas; la so muyer, Rosalía Iglesias, pa la que pide cuatro años y dos meses de cárcel; l'exconseyeru de Deportes de la Comunidá de Madrid Alberto López Viejo, pal que reclama 11 años y mediu; y l'exalcalde de Majadahonda Guillermo Ortega, pal que solicita otros 20 años.

   Amás, considera cooperadores necesarios d'estos delitos a otres 16 persones, ente les que tán los presuntos líderes de la trama 'Gürtel', Francisco Correa y Pablo Crespo; los extesoreros del PP Álvaro Lapuerta y Ángel Sanchís; la exmuyer de Correa, Carmen Rodríguez Quijano; la muyer de López Viejo, Teresa Gabarra; y el testaferru de Bárcenas en Suiza, Iván Yáñez.

   Completen la llista d'acusaos pola Abogacía del Estáu'l contable de la rede, José Luis Izquierdo; Isabel Jordán, Alicia Mínguez, Javier Nombela, Luis de Miguel, Antonio Villaverde, Jacobo Ortega y Jacobo Gordon.