L'expresidente del Gobiernu José Luis Rodríguez Zapatero confirmó esti miércoles que caltuvo un alcuentru col secretariu xeneral de Podemos, Pablo Iglesias, y col so númberu dos, Íñigo Errejón, favorecíu pol exministru socialista José Bono, que tien cierta relación con Iglesias porque defendió al so padre ante'l Tribunal d'Orde Públicu franquista.

   Nuna entrevista na Cadena Ser recoyida por Europa Press, Zapatero confirmó la información adelantada pol 'Huffington Post' y apuntó que nun informó de la xunta al líder del so partíu, Pedro Sánchez, porque se trataba "d'un alcuentru personal", igual que nun lu informa de tola so axenda. Eso sí, añadió que lo comentó con él "díes dempués".

   L'exjefe del Executivu aseguró que foi un alcuentru interesante mientres el cual falaron sobremanera de Llatinoamérica y del euru. Zapatero dexó claro que nun cree que Podemos vaya a arrampuñar al PSOE la hexemonía de la izquierda pero cree que la so emerxencia pue tener resultaos positivos pa que "desapaeza del escenariu políticu" aquel berru de "nun mos representen".

   Eso sí, reconoció que nesi alcuentru quedaron clares "discrepancies bien notables", por exemplu sobre l'empeñu de Podemos de convocar un procesu constituyente, porque cree qu'en 1978 España "acertó na trayectoria" y que "esa voluntá de país modernu", d'Estáu Social y Democráticu de Derechu, "tien que caltenese nel puxu de la sociedá española" y recuperar esi rumbu anque agora se viviera una crisis que foi "un shock".

   Zapatero definió l'alcuentru colos dirixentes de Podemos como "cordial y correctu", "puramente de conocencia personal", dixo qu'Iglesias y Errejón paeciéron-y iguales a como se ven nos medios y pidió que nun se torne a Iglesias "en daqué distinta a lo que ye, un políticu d'esti país".