El xuez de l'Audiencia Nacional Fernando Andreu envió a prisión al etarra Santiago Arrospide Sarasola, 'Santi Potros', 48 díes dempués de que los maxistraos de la Estaya Primera ordenaren la so escarcelación en descontando una pena cumplida en Francia. El xuez alega qu'existe un eleváu riesgu de fuga por cuenta de les altes penes a les que s'enfrenta por dos acciones terroristes de los @80.

   "La gravedá de les penes ye tal que que la so elusión pudiera constituyir tentación intensa como pa tratar de ponese fuera del algame del aparatu xudicial", diz el xuez, qu'alvierte que 'Potros' podría evitar l'acción de la xusticia abellugándose en Francia, que se negó a entregalu nes dos causes poles qu'agora lu encarcelen.

   "Nun pue resalvase que la organización terrorista ETA cuenta tovía con activos personales y medios abondo pa procurar la fuga y tapecimientu de los sos miembros, tal como se constató n'ocasiones anteriores", diz el xuez en dos autos fechos públicos esti martes. Tamién destaca "la inminencia" de la celebración de los xuicios, puesto que la so instrucción ta acabada.

   L'etarra, escarceláu'l pasáu 4 d'avientu (permaneció 46 díes en llibertá), negóse a declarar na so comparecencia ante'l maxistráu que-y informó sobre les dos causes poles qu'acordó la so detención, un atentáu en 1987 y un intentu d'asesinatu en 1986, según informaron fontes xurídiques. Al miembru d'ETA detuviéronlu esti llunes nuna operación conxunta de la Policía y la Guardia Civil, na so población de Lasarte (Gipuzkoa).

   Andreu dispunxo'l so encarcelamientu por un atentáu cometíu en Barcelona en 1987 contra una patrulla del Institutu Armáu y pol intentu d'asesinatu del fiscal xeneral del Estáu Luis Antonio Burón Barba en 1986. Impúta-y la comisión de delitos d'atentáu, asesinatu, lesiones, estragos, usu ilexítimu de vehículu a motor y falsificación de plaques de matrícula.

   L'atentáu de 1987 cometiólu un comandu d'ETA per mediu de la ubicación d'un coche-bomba al pasu d'un vehículu oficial de la Guardia Civil en Barcelona. Nél resultó asesináu Juan Fructuoso Gómez, que taba nel entornu del llugar nel qu'españó'l coche-bomba y sufrieron firíes los guardies civiles ocupantes del vehículu, según otres persones que taben nes proximidaes.

   El xuez asegura qu'Arrozpide yera responsable, nel momentu de los fechos, del 'comandu Barcelona' "al qu'encargaría la comisión de los fechos, apurriendo a los miembros d'ésti, ente otros Domingo Troitiño Arranz y Rafael Caride Simón, les instrucciones y la comisión pa la so comisión.

   La otra causa investiga l'atentáu fallíu en 1986 contra'l daquella fiscal xeneral del Estáu Luis Antonio Burón Barba. L'acción terrorista nun llegó a producise porque los integrantes del Comandu Madrid d'ETA encargaos de llevalo a cabu, los etarres Idoia López Riaño, 'la Tigresa', y José Ignacio De Juana Chaos, "quedaron dormíos" la mañana que se fixara pa materializar l'asesinatu.

   Nesti casu, el xuez señala tamién a 'Potros' como "organizador y xefe" de los comandos illegales, ente ellos el 'Madrid'.